Дундговь аймгийн Сайнцагаан сумын нутаг Наран багийн Бор-Овоо хэмээх газарт хоёр автомашин мөргөлдөж, автомашины төмөр эд ангид хүн хавчуулагджээ. Энэ ослын тухай дуудлагыг наймдугаар сарын 31-ний 18:32 цагт Онцгой байдлын ерөнхий газар хүлээн авсан байна. Тус аймгийн Онцгой байдлын газрын алба хаагчид шуурхай очиж ажиллахад Өмнөговь аймгаас Улаанбаатар хотын чиглэлд нэг зорчигчтой зорчиж явсан иргэн “А”-ын Хино ачааны автомашинтай, Улаанбаатар хотоос Өмнөговь аймгийн чиглэлд нэг зорчигчтой зорчиж явсан иргэн “Б”-ын Приус-20  суудлын автомашин мөргөлдсөн байна. Ослын улмаас Өмнөговь аймгийн Даланзадгад сумын III багийн харьяат иргэн 43 настай эрэгтэй төмөр эд ангид хавчуулагдан гэмтсэн байна. Мөн суудлын автомашин нь шатсан бөгөөд галын дөлд хайрагдан түлэгдсэн 14 настай эрэгтэй хүүхдийг тус тус эсэн мэнд гаргаж аймгийн Нэгдсэн эмнэлэгт, Онцгой байдлын алба хаагчид хүргэж өгсөн талаар мэдээлэв.