Хөдөлмөр, нийгмийн хамгааллын сайд Д.Сарангэрэл өчигдөр буюу наймдугаар сарын 31-ны өдөр шуурхай хурал зарлажээ. Мөн удирдлагын багт ажиллах зарчмаа танилцуулан тодорхой үүрэг даалгавар өгч дараах байр суурийг илэрхийллээ. Тэрбээр “Хөдөлмөр, нийгмийн хамгаалал бол хүний төлөөх үйлс юм. Тэтгэврийн шинэчлэлийг оновчтой хийхэд илүү анхаарч, халамжийг өгөх ёстой хүнд нь өгнө. Тиймээс энд ажиллаж буй төрийн албан хаагч итгэлтэй, зүтгэлтэй, сэтгэлтэй байх учиртай. Энэ хандлагыг бий болгоход удирдлага, багийн дэмжлэг, уур амьсгал хамтын ажиллагаа чухал байдаг. Тиймээс би улс төрийн дарамт шахалт үзүүлэхгүй.

      Харин хууль журам зөрчих, алдаа гаргах, ажлаа орхигдуулах асуудал гарвал хариуцлага тооцож таарна. Тэгэхээр та бүхний ажил алба надаас бус танаас шалтгаална. Бусдаар бол төрийн алба тогтвортой байх ёстой. ХНХЯ-ны баг хамт олон чадварлаг, туршлагатай гэдгийг УИХ-ын нийгмийн бодлогын байнгын хорооны гишүүний хувиар холбоотой хамтарч ажиллаж ирсэн тул мэднэ. Багаараа үр дүнтэй ажиллаж тавьсан зорилтоо хэрэгжүүлж чадна гэдэгт итгэлтэй байна” гэв.