Есдүгээр  сарын 1. Сургуулиа, ангийнхныгаа, багшийгаа санасан хүүхдүүд баяр хөөрөөр дүүрэн сургууль руугаа алхаж байна. Тэд өөрт тохиолдсон сонирхолтой дурсамжаа ам уралдан ярьж, зарим нь найзуудаасаа бишүүрхсээр ширээндээ сууцгаана. Сурагчийн дүрэмт хувцсаа өмсөж, шинэ цүнх үүрсэн нэгдүгээр ангийнхан эрдмийн их өргөөтэйгөө танилцаж, зарим нь уйлж, зарим нь инээсээр сурагч болдог доо. 

-ЭНЭ ЖИЛ ХҮҮХДҮҮДИЙГ СУГАЛААГҮЙ ЭЛСҮҮЛЭВ-

     БШУЯ-аас өгсөн мэдээллээр боловсролын салбарын системийн мэдээллийг нэгтгэхэд 140.904 хүүхдийг цэцэрлэгт хамруулах бүрэн боломжтой. Тодруулбал,

• Төрийн өмчийн болон хувийн хэвшлийн цэцэрлэгүүдэд 124.244

• Түрээсийн байр буюу салбар цэцэрлэг 15.133

• Байгууллагын цэцэрлэгт 2.527 хүүхэд суралцах боломжтой байна. 

Энэ жил цэцэрлэгийн эхний ээлжийн хүсэлтийг энэ сарын 10-24-ний хооронд цахимаар хүлээн авахад 111.542 хүүхэд бүртгүүлжээ. Мөн Нийслэлийн боловсролын газрын дарга Т.Ням-Очир “Эхний ээлжийн бүртгэлээс хоцорсон эцэг эхчүүд 2022 оны есдүгээр сарын 10-25 болон 2022 оны аравдугаар сарын 3-24-ний хооронд бүртгүүлэх боломжтой. Хүүхэд аль цэцэрлэгт хуваарилагдсан талаар мэдээллийг эцэг эх, асран хамгаалагчийн утсанд мессежээр илгээх ба хуваарилагдсан талаар мэдээлэл ирмэгц тухайн цэцэрлэгтээ очиж гэрээ байгуулна” гэсэн юм. 2021 онд нийт ерөнхий боловсролын 848 сургууль, 35.110 үндсэн багш, 712.400 гаруй сурагчтайгаар үйл ажиллагаа явуулж байв.

-13 СУРГУУЛИЙН ХААЛГЫГ БАРЬЖ, НАЙМАН СУРГУУЛИЙГ БУСАД СУРГУУЛЬТАЙ НЭГТГЭЖЭЭ-

        Монгол Улсын хэмжээнд 2021-2022 оны хичээлийн жилд 88 их, дээд сургуульд 147 мянган оюутан суралцаж байв.  Монгол Улсын засгийн газрын тогтоол, Боловсрол, шинжлэх ухааны сайдын тушаалаар 13 сургуулийн сургалтын үйл ажиллагааг зогсоож, найман сургуулийг бусад сургуулийн харьяанд шилжүүлж нэгтгэжээ. 

Тусгай зөвшөөрөл нь цуцлагдаж байгаа 21 байгууллагад 163 багш ажиллаж, 1567 оюутан суралцаж байсан юм. Энэ багш нар шаардлага хангасан тохиолдолд бусад сургуульд шилжин ажиллах боломжийг нээж байна. Харин оюутнууд хүссэн сургуульдаа шилжин суралцах аж.

21 сургуулийн тусгай зөвшөөрлийг цуцлахаас гадна 24 сургуульд зөрчил дутагдлаа засах зургаан сарын хугацаатай үүрэг өгчээ. Энэ хугацаанд стандарт шаардлагыг хангуулаагүй, хуульд нийцүүлсэн үйл ажиллагааг явуулаагүй тохиолдолд мөн тусгай зөвшөөрлийг цуцлах юм.

Сургалтын үйл ажиллагааг зогсоохоос гадна сургуулиудын хөтөлбөрт мөн шалгалт хийж хүчингүй болгож байна. Өнгөрсөн хичээлийн жилд их, дээд сургуулиуд 2564 хөтөлбөрөөр мэргэжилтэн бэлтгэж байсан бол 908 хөтөлбөрийг хүчингүй болголоо. Ингэснээр 1656 хөтөлбөр хүчин төгөлдөр хэрэгжих юм.

-ХИЧЭЭЛИЙН ЖИЛИЙН БҮТЦИЙГ ӨӨРЧЛӨХГҮЙ, ГУРВАН УЛИРЛААР ХИЧЭЭЛЛЭНЭ-

     Боловсрол, соёл, шинжлэх ухаан, спортын сайдын 2020 оны А/244 дүгээр тушаалаар хичээлийн жилийн бүтцэд өөрчлөлт оруулан баталж, тухайн бүтцийг өмчийн бүх хэлбэрийн ерөнхий боловсролын сургууль мөрдөж байна. “Өвөл хүйтний эрч чангарсан үед томуу, томуу төст өвчин ихээр дэлгэрдгээс хөл хорио тогтоох, малчдын хүүхдүүд цаг агаарын хүндрэлтэй нөхцөлд ар гэртээ туслахаар явах зэргээс шалтгаалж хичээл тасалдах, хичээлийн жилийн төгсгөл буюу зургадугаар сарын сүүлээр иргэд гэр бүлээрээ амарч заншсанаас сурагчдын ирц бүрдэхгүй байх” зэрэг асуудлыг эцэг эх, олон нийт, боловсролын салбарын багш, ажилтан сурагчдаас авсан  санал асуулгад хөндсөн.

   Иймд хичээлийн жилийн бүтцийг Боловсролын хүрээлэн, БСШУС хамтран боловсруулж, баталсан болно. Өөрөөр хэлбэл, хичээлийн жилийн бүтцэд энэ жил гэнэт өөрчлөлт оруулсан зүйлгүй юм. Нэгдүгээр улирлын найм эсвэл ес дэх долоо хоногт сургуулиуд хичээлийн агуулгаа тохируулж урлаг, соёл хүмүүжлийн зэрэг танхимын гадуурх сургалт зохион байгуулах замаар сурагчдын оюуны ачааллыг бууруулах арга хэмжээ авах боломжтой.