Засгийн газрын ээлжит хуралдаанаар гаргасан шийдвэрийг Цахим хөгжил, харилцаа холбооны яамны сайд Н.Учрал мэдээлэл хийлээ. 

        Тэрбээр “Монгол улсын засгийн газрын хуралдаанаар шинэ сэргэлтийн бодлогын хүрээнд авч хэрэгжүүлсэн зургаан бодлогын нэг болох төрийн бүтээмжийн сэргэлтийг эрчимжүүлэх чиглэлээр төрийн хяналтын хуулийн хэрэгжилт болон “Цахим Монгол үндэстэн” хөтөлбөрийн талаар танилцуулга хийгдсэн. Үүнтэй холбогдуулан Монгол улсын Ерөнхий сайд үүрэг чиглэл өглөө. Төрийн хяналтын хуулийг хэрэгжүүлэх үйл явцыг илүү сайжруулахад Мэдээлэл технологи, харилцаа холбооны салбарын хөгжлийн хурдыг ашиглах, цаашлаад авилгалын индексийг бууруулж эерэг нөлөө үзүүлэхэд Цахим хөгжил, харилцааны холбооны яам анхаарч ажиллахыг үүрэг болголоо.

        Өнгөрсөн хоёр жилийн хугацаанд парламентаар хэлэлцэж нийтийн мэдээллийн хууль, хувь хүний мэдээллийн хамгаалах хууль, цахим гарын үсгийн хууль, кибер аюулгүй байдлын хуулийг баталсан. Нийтийн мэдээллийн хуулинд зарим мэдээллүүд нээлттэй боло ёстой талаар хуульчилсан байдаг. Энэхүү мэдээллийг бусад салбаруудтай хамтран олон нийтэд хүртээмжтэй болгоход ажиллана. Ингэснээр иргэд газар эзэмшигчийн мэдээлэл, орон сууцны комиссын шийдвэр зэрэгтэй танилцаж, харах нь нээлттэй болсон. Иргэдийн мэдэх эрхийг хангах, тодорхой мэдээллээр хангадаг болж байна. Хувь хүний мэдээллийн тухай хуулинд төр тухайн иргэний мэдээллийг ямар байдлаар ашигласан гэдгийг тухайн хүн өөрөө харах боломжтой. Улаанбаатар хотын түгжрэл, төрийн албаны хүнд сурталтай холбогдуулан тоон гарын үсгийг иргэн болгоны хэрэглээнд болон банкны үйл ажиллагаанд нэвтрүүлэхэд онцгой анхаарна. Мөн улсын хэмжээнд таван алслагдсан сум болон таван боомтод шилэн кабель тавих ажил энэ онд явагдаж дуусна. Есдүгээр сарын 5,6-нд НҮБ, Монгол улсын засгийн газар, цахим хөгжил, харилцаа холбооны яам хамтран олон улсын хурал зохион байгуулна. Энэ үеэр НҮБ, манай улсыг цахим шилжилтийн үлгэр жишээ орноор албан ёсоор зарлана” гэв.