Эрчим хүчний сайдаар Б.Чойжилсүрэн томилогдлоо. Тэрбээр "Би автоматикч, телемеханикч гэсэн хос мэргэжилтэй. Орчин үеийн хэллэгээр бол мэдээллийн технологийн инженер, цахилгааны инженер гэсэн үг. Би энэ салбарт ажиллаж байгаагүй гэхдээ мэргэшиж таван жил сурсан. Юун түрүүнд гурван ажлыг хийх зорилготой байна.  Хамгийн эхэнд манай салбар дэд бүтцийг хөгжүүлдэг чухал салбар тул аюулгүй ажиллагаа, техникийн бэлэн байдал нэн тэргүүний эгнээнд тавигдана. Өвөл хаяанд ирж байгаа болохоор өвөлжилтийн бэлтгэл ажлын системээр бүрэн хангуулах ажлыг зорилго болгож байна. Хоёрдугаарт, эрчим хүчний салбар 2019 оноос эхэлсэн ковидын нөхцөл байдалтай холбоотой хүндрэл, энэ жил ОХУ, Украины дайны нөхцөл байдалтай холбоотой санхүүгийн хувьд хүнд нөхцөлтэй байна. Эрчим хүчний бүтээгдэхүүний өртөг ковидын өмнөх үетэй харьцуулахад 30-аас доошгүй хувиар өссөн байгаа. Энэ асуудлыг үе шаттайгаар зохицуулах арга хэмжээ авч, хэрэгжүүлнэ. Гуравдугаарт, төвийн эрчим хүчний систем төвдөө  дулаан болон цахилгаан эрчим хүчний дутагдалд орж эхэлсэн. Иймээс “ТЭЦ III” цахилгаан станцын өргөтгөлийг энэ ондоо багтаж эхлүүлэх ажлыг шуурхай хөөцөлдөхөөр зэхэж байна. Мөн Таван толгойн цахилгаан станцыг засварлан шинэчлэх ажил хийхээр төлөвлөж байгаа. Түүнчлэн, “Эгийн гол”-ын  цахилгаан станцын ажлыг эхлүүлэх, эс үүсвэрийг олохоор ажиллана" гэлээ.