Монгол улсын засгийн газрын шинэ бүрэлдэхүүнд цахим хөгжил, харилцаа холбооны яамны сайд Н.Учрал томилогдлоо. 

           Тэрбээр энэ үеэр “Засгийн газрын хуулинд нэгдүгээр сарын 01-ны өдрөөс өөрчлөлт ороод хэрэгжиж байна. Яамны бүтэц, орон тоо болон төсөв хангалттай батлагдсан. Цаашдаа цахим гарын үсгийг дагалдуулан төрийн албаны цалингийн итгэлцүүрийг мэдээлэл технологийн салбарын мэргэжилтэнгүүд дээр өөрөөр тогтоох хуулийг дагалдуулж хийсэн. Мэдээлэл технологийн салбарын илүү бүтээмжтэй, цомхон, чадварлаг мэргэжилтэн багийг бүрдүүлж яамны үйл ажиллагааг чадваржуулна. Манай салбарын хувьд бусдаас харьцангуй нарийн мэргэжил шаарддаг. Тиймээс төрийн албаны хуулинд итгэлцүүрийг өөрөөр тогтоож салбарын албан хаагчдын цалин хөлс, нийгмийн баталгааг нэмэгдүүлж ажиллана. Нарийн мэргэжлийн боловсон хүчин ихэнх нь хувийн секторуудад байдаг учраас тэдгээр залуусыг төрд ажиллуулахад бага зэрэг хүндрэлтэй. Тиймээс төрөөс заавал бүх ажлыг хэрэгжүүлэхгүйгээр үндсэн бодлогоор хангаж хувийн хэвшлүүд, мэргэжилтнүүдтэй хамтарч ажиллана. Мөн хатуу дэд бүтцийн ажлыг өрнүүлэхэд шаардлагатай төсөв мөнгийг баталж эхэлнэ. Хэд хэдэн сумдад шилэн кабель тавигдаагүй байгаа. Энэ мэт ажлууд дээр анхаарна. Хувийн хэвшил, мэргэжилтнүүдээрээ дамжуулан гүйцэтгүүлж, илүү экосистемийг бий болгоход манай салбар хичээж ажиллах болно” гэв.