"Аравт-2022" олон улсын морин цэргийн уралдааны ойрын зайн холимог буухиа өнөөдөр ОХУ-ын баг тамирчдаар эхэлж, Узбекистан Улсын баг тамирчдаар үргэлжиллээ.Багууд гараанаас явганаар гарч 3.6 км, 4.1 км замыг морьтой туулах явцдаа маршрутын дагуу байрлах цэгүүдэд өгөгдсөн даалгаврыг гүйцэтгэж, барианд морьтой орж ирэв. Тодруулбал, гранат шидэж, саадын зурвас туулж, буудлагын дасгалыг гүйцэтгэж, торон саадыг туулж, мориндоо мордлоо.

       Үүний дараа тасгууд тактикийн талбайн эхлэх заагт тасгийн захирагчийн дохиогоор нэгийн цуваанд шилжиж, туган саадыг сүлжих даалгаврыг гүйцэтгэж, морины давхилт дунд гранат шидэж, барианд оров.Ингэхдээ даалгавраа гүйцэтгэж чадаагүй нөхцөлд торгуулийн тойрог тойрч байв. Төгсгөлд нь барианд орсон тамирчдын агт морь, зэвсэг, эд хэрэглэл бүрэн эсэхийг уралдаан зохион байгуулах хорооныхон шалгасан юм.

Ойрын зайн холимог буухиа маргааш Бүгд Найрамдах Зимбабве Улс, Монгол Улсын баг тамирчдаар үргэлжилнэ.