ШӨХТГ-аас нэр бүхий есөн банканд орон сууцны хөнгөлөлттэй ипотекийн зээл олгосны шимтгэлийг гарч буй зардалтай нь уялдуулан үндэслэлтэй тогтоолгүйгээр зээл олгосны шимтгэлийг 0.5-1 хувиар тогтоосон гэсэн үндэслэлээр торгуул ноогдуулсан. Тэгвэл уг асуудлаар ШӨХТГ-ын дарга С.Мөнхчулуун мэдэгдэл хийлээ.

Тэрбээр “ШӨХТГ-т 2022 оны тавдугаар сард банкнууд зээл олгосны шитгэл авч байгаа нь хэрэглэгчдийн хохироож байна гэсэн гомдол ирсэн. Гомдолтой холбоотойгоор  бидний зүгээс арилжааны нэр бүхий 11 банк дээр шалгалт явуулахаар болсон. Гэвч арилжааны банк шалгалт хийлгэх боломжгүй гэсэн хариу өгсөн. Үүнтэй холбоотойгоор нэр бүхий 11 банканд холбогдуулан зөрчлийн хэрэг бүртгэлийн ажлыг зургадугаар сарын 15-ны өдөр эхлүүлсэн. Ингээд  хяналт, шалгалтын ажил наймдугаар сарын 12-ны өдөр дууссан. Зөрчлийн хэрэг бүртгэлийн явцад холбогдогч 11 банкнаас зээлдэгчийн төлж байгаа 0.5-1 хувийн шимтгэл нь тухайн зээлдэгчид зарцуулагдаж байгаа эсэх талаар шалгахад тодорхой тооцоо судалгаа гаргаагүй, бодит зардалтай уялдаагүйгээр мөнгөн дүнг тогтоосон зөрчил илэрсэн. Орон сууцны хөнгөлөлттэй ипотекийн зээл олгож байгаа шимтгэлийг гарч байгаа зардалтай нь уялдуулан үндэслэлтэй тогтоогоогүй нь зээл олгосны шимтгэлийг 0.5-1 хувиар тогтоосон нь Зөрчлийн тухай хуулийн тусгай ангийн 10-ын долдугаар зүйлийн 4.4.7 дугаар заалтын зөрчсөн гэж үзсэн. Ийм учраас Зөрчлийн тухай хуулийн дагуу тус бүр 20 сая төгрөгөөр торгосон. Чингис хаан банк, Үндэсний хөрөнгө оруулалтын банк нь сүүлийн хоёр жилийн хугацаанд ипотекийн зээл олгоогүй учир торгоогүй. Мөн нэр бүхий есөн банканд зээл олголтын шимтгэлийг гарч байгаа зардалтай нь уялдуулан үндэслэлтэй тогтоож хэрэглэгчтэй байгуулж байгаа зээлийн гэрээнд өөрчлөлт оруулах арга хэмжээ авч зөрчлийн үр дагаврыг арилгахыг даалгаж, 30 хоногийн хугацаатай улсын байцаагчийн албан даалгаврыг хүргүүлэн ажиллаж байна. Шимтгэл төлсөн иргэд хуулийн дагуу мөнгө буцаан авах боломжтой. Гэхдээ энэ асуудал эцэслэн шийдвэрлэгдээгүй байгаа зарим арилжааны банк шүүхэд хандана гэдгээ хэлсэн. Асуудал бүрэн шийдэгдсэний дараа иргэд шимтгэл төлсөн мөнгөө буцаан авах боломжтой” гэв.