Монголын нийт авто тээвэрчдийн нэгдсэн холбооноос өнөөдөр үнийн өсөлтийн талаар мэдээлэл хийлээ.

     Тус холбооноос “Нийт тээвэрчид өнөөдөр ажлын байраа алдаж байна. Үүний гол шалтгаан нь Чингэлэг тээвэртэй холбоотой. Гурван задгай тээврээр орж ирэх машин 8,9,10 чингэлэг тээврээр орж ирж байгаа. Нэг машиныг гурав хуваагаад чингэлэгт хийнэ гэдэг эдийн засгийг хүндрүүлж, үнийн өсөлтөд нөлөөлж байгаа. Мөн ачаа барааны үнийн өсөлт зэрэг бусад зүйлст ч хүндрэл учирч байна. Энэ бол төр, засгийн буруу шийдвэрийн үр дүн. Хаврын жагсаал, цуглаанаас хойш тээвэрчидтэй хамтран ажиллана гэсэн амлалтдаа хүрээгүй. Харин Тээвэрчдийн түр зөвлөл гэсэн хууль бус хүмүүстэй хамтран, тээвэрчдийн эрхийг зөрчиж байна. Үүнийг удаа дараа Авлигатай тэмцэх газар болон бусад холбогдох байгууллагад шалгуулахаар өгсөн. Одоогоор хариу нь гараагүй байна. Ер буруу шийдвэр гаргаж, асуудал үүсгэсэн Зам, тээврийн хөгжлийн сайд Л.Халтар огцрох цаг нь болсон. Хэрэв тээвэрчдэд тулгамдаж байгаа эл асуудлыг шийдэхгүй бол Монголын тээвэрчид бүгд том тэрэгтэй жагсаал хийнэ. Цаашлаад 21 аймгаас тээвэрчид нэгдэж, нэгдсэн холбоонд хүч нэмж, эвлэлдэн нэгдэж, энэ асуудлыг мөн бодлогын хүрээнд, эрх зүйн хүрээнд төр, засагтай хамтран ажиллах санамж бичгийг удаа дараа өгсөөр байх болно” гэв.