Энхтайваны гүүрний зүүн талд, Дунд гол урсдаг хэсгийн 11.8 га газарт “Азид хамгийн томд тооцогдох усан парк, спорт цогцолбор соёл амралтын хүрээлэн”-г барина гэх мэдээлэл 2016 онд цацагдаж байсан. Гэвч тус цогцолборын ажлыг 25 давхар орон сууцны хороолол барих ажил болгон хувиргасан талаарх асуудал шийдэгдээгүй хэвээр байгаа.

        Уг асуудлын талаар Туул голын сав газрын захиргаанаас 2022 оны долдугаар сарын 1-ний өдрийн 01/424 дугаар албан бичгээр ирүүлсэн. Үүнийг  2022 оны долдугаар сарын 6-ны өдөр хүлээн авч, холбогдох мөрдөн шалгах ажиллагааг явуулаад Эрүүгийн хуулийн тусгай ангийн 22.1 дүгээр зүйлийн 1 дэх хэсэгт заасан гэмт хэргийн шинжтэй үндэслэлээр 2021 оны долдугаар сарын 25-ны өдөр хэрэг бүртгэлтийн хэрэг нээж шийдвэрлэсэн болохыг АТГ-с мэдэгджээ.

         Мөн уг газар барилга барьж байгаа “Эм Энд Жи” компанийг шалгаж байгаа аж. Тус компани одоогоор 25 давхар бүхий дөрвөн орон сууцын суурийг босгож, иргэдээс урьдчилсан захиалгаа аваад эхэлжээ.

       Энэ талаар НЗДТГ-ын хэвлэлийн төлөөлөгч Н.Сугараас тодруулахад “Усан паркийн асуудал дээр НЗДТГ хууль зөрчөөгүй. Анх 2008 оны есдүгээр сард орон сууцны зориулалтаар зөвшөөрөл олгогдсон байдаг. Уг зөвшөөрөл хоёр ч удаа цуцлагдсан. 2020 оны есдүгээр сарын 30-ны өдөр усан парк, орон сууц хосолсон бүтээн байгуулалт хийгдэнэ гэсэн  шийдвэр гарсан ч 2021 оны гуравдугаар сарын 3-ны өдрийн шүүхийн шийдвэрээр орон сууцны зөвшөөрөл олгож барилга баригдаад явж байгаа. Шүүхээс шийдвэр гаргасан болохоос НЗДТГ хууль зөрчсөн асуудал байхгүй” гэлээ.