Манай улсын эмэгтэй шатарчид Дэлхийн шатрын 44-р олимпиадын III өрөгт чансааны 7-д эрэмбэлэгдсэн АНУ-ын багийг “3-1” харьцаатай хожиж шуугиан дэгдээсэн. Манай эмэгтэй шатарчид даваа гаригт дэлхийн чансааны 10-т эрэмбэлэгдсэн Казахстаны багтай тоглож “2:2” харьцаатай тэнцсэн.

   Нэгдүгээр ширээнд их мастер А.Энхтуул, гуравдугаар ширээнд олон улсын мастер Т.Мөнхзул тэнцэж, хоёрдугаар ширээнд олон улсын мастер Б.Баярмаа ялагдсан ч дөрөвдүгээр ширээнд олон улсын шатрын холбооны мастер Д.Мөнхзул ялалт байгуулсан юм. Ингэснээр Монголын эмэгтэй баг гурван хожил, нэг тэнцээ, нийт долоон оноотой болж тэмцээний есдүгээр байрт бичигдэж эхэллээ.

    Эмэгтэй өрсөлдөөний IV өргийн дараах байдлаар нийт 162 багаас нэг ч ялагдаагүй 11 баг үлдсэн. Тэмцээнийг дөрвөн хожил байгуулсан Азербайжан, Польш, Украин, Франц, Гүрж, Румын болон эзэн орон болох Энэтхэгийн 1, 2-р багууд тэргүүлж байна. Харин удаах байранд гурав хожиж, нэг тэнцсэн Монгол, Казахстан, Кубын багууд бичигдэж байна.

     Монголын эрэгтэй баг даваа гаригт дэлхийн чансааны гуравдугаарт эрэмбэлэгдсэн Норвегийн багтай “2:2” харьцаатай тэнцэж мөн л том шуугиан дэгдээлээ. Нэгдүгээр ширээнд цагаанаар Дэлхийн шатрын таван удаагийн аварга, дэлхийн чансааг сүүлийн арван жил тасралтгүй тэргүүлж буй их мастер Магнус Карлсен тоглосон. Түүнтэй Монгол Улсын аварга, их мастер Д.Батсүрэн хараар тоглож ялагдсан юм. Харин хоёр болон гуравдугаар ширээнд их мастер Б.Гүндаваа, С.Билгүүн нар тэнцэж, дөрөвдүгээр ширээнд олон улсын мастер С.Ган-Эрдэнэ хожсоноор, манай эрэгтэй баг дэлхийн аваргын багтай тэнцсэн юм. Монгол Улсын эрэгтэй шатарчид IV өргийн дараах байдлаар хоёр хожиж, хоёр тэнцэж, нийт зургаан оноотой болж 188 багаас 18-д бичигдэж байна.