Өнгөрсөн амралтын өдрүүдэд буюу долдугаар сарын 30-31-нд Тээврийн цагдаагийн албаны Жижүүрийн шуурхай удирдлагын төв нийт 505 дуудлага хүлээн авснаас зам тээврийн ослын шинжтэй 318 мэдээлэл бүртгэгджээ. Бүртгэгдсэн зам тээврийн ослын улмаас нийслэлд гурван, орон нутагт зургаан, нийт есөн хүн гэмтэж бэртсэн бол ноцтой ослын улмаас орон нутагт нэг хүний амь хохирсон байна.

     Тодруулбал, нийслэлд явган зорчигч хэлбэрээр гурван хүн гэмтсэний нэг нь хүүхэд байсан бол орон нутагт автомашин онхолдсон ослын улмаас хоёр  хүн гэмтэж, нэг иргэн нас барж, мотоциклтой холбоотой гурван  осол бүртгэгдэж дөрвөн хүн бэртжээ.
 
      Гудамж замд зохион байгуулсан хяналт, шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 244 зөрчил илрүүлж, учирч болох эрсдэлээс урьдчилан сэргийлж ажилласан байна. Тухайлбал, Согтууруулах ундааны зүйл хэрэглэсэн үедээ хөдөлгөөнд оролцож осолд холбогдсон дөрвөн тохиолдол бүртгэгдсэнээс гурав нь жолооч, нэг нь явган зорчигч байжээ. Энэ оны эхний долдугаар сарын байдлаар улсын хэмжээнд мотоциклтой холбоотой 264 осол бүртгэгдсэнээс 136 хүн гэмтэж бэртэж, 61 хүн нас баржээ. Зөвхөн өнгөрсөн долдугаар сард мотоциклтой холбоотой 54 осол бүртгэгдсэнээс 27 хүн гэмтэж, есөн хүн нас барсан байна.