Туул голын эрэгт сууж байсан хоёр охин руу нохой дайрсны улмаас  тэд усанд унаж, нэг нь амиа алдсан харамсалтай хэрэг гарсан. Дуудлага мэдээллийн дагуу аврагчид 25 км зам туулан ослын газарт очиж, 18 настай эмэгтэйг аварчээ. Харин дөрвөн настай охин эмнэлгийн тусламж, үйлчилгээ авч чадалгүй амиа алдсан. Үүнтэй холбоотойгоор Улаанбаатар хотын нохой, муурыг хэрхэн устгаж байгаа талаар Улаанбаатар хотын Захирагчийн ажлын албаны Орчны бохирдол, хог хаягдлын удирдлагын мэргэжилтэн Б.Мөнхбаяраас тодрууллаа.

     Тэрбээр “Орос, Укрианы дайн болон шатахууны үнэ нэмэгдсэнтэй холбоотойгоор бууны сум хомстож, үнэ нь нэмэгдсэн. Тиймээс энэ жил нохой, муурыг бага хэмжээгээр буюу дуудлагын дагуу устгаж байгаа. Уг нь өдөрт 150-200 нохой устгадаг байсан. Одоо 40-50 нохой устгаж байна. Өнгөрсөн жилүүдэд нэг нохойг 12 мянган төгрөгөөр устгадаг байсан бол одоо 29 мянган төгрөгөөр устгах эдийн засгийн тооцоолол гарсан. Тиймээс жилд нохой, муур устгахад 1.2 тэрбум төгрөг төсөвлөдөг байсныг гурван тэрбум орчим төгрөг болгохоос өөр аргагүй байгаа. Бид энэ тухай санал, хүсэлтээ хүргүүлж, Азийн сан болон олон улсын байгууллагуудаас тусламж хүсэж байгаа” гэв.