Ус, цаг агаар, орчны мэдээ мэдээллийн газраас наймдугаар сарын цаг агаарын урьдчилсан төлөвийг гаргажээ. Энэ талаар цаг уурч Ш. Тэргэлээс тодрууллаа. Ирэх наймдугаар сард дийлэнх нутгаар олон жилийн дунджын орчим агаарын темпартуратай байна. Олон жилийн дундаж цаг агаарын темпаратурын хувьд Алтай, Хангай, Хөвсгөл, Хэнтийн уулархаг нутгаар харьцангуй сэрүүн буюу 8-12 градус дулаан. Их нууруудын хотгор, Алтайн өвөр говь болон Говийн бүс нутаг мөн Дорнодын тал нутгаар харьцангуй дулаан буюу 20-24 градус дулаантай байна. Бусад нутгаараа 12-20 градусын агаарын темпартуртай байдаг.

    Говийн бүс нутгийн ихэнх болон зүүн аймгуудын ихэнх хэсгээр олон жилийн дунджаас дулаан. Тодруулбал, Баянхонгор аймгийн өмнөд, Дундговийн өмнөд хэсэг, Өмнөговь, Дорноговь, Хэнтий аймагт болон Сүхбаатар аймгийн өмнөд хэсгээр олон жилийн дунджаас дулаан байх төлөвтэй.  Мөн хур тунадас Монгол орны ихэнх нутгаар олон жилийн дунджын орчим байна. Хэнтий нуруу орчмоор тодруулбал, Сэлэнгэ болон Төв аймгуудын нутгийн зүүн хэсэг болон Хэнтийн аймаг, Дорнод аймгийн баруун хэсгээр олон жилийн дунджаас ахиу хур тунадас орно. Хур тунадас ахиу орох төлөвтэй байгаа аймгуудад гэнэтийн аадар бороо орох, гол мөрний усны түвшин нэмэгдэж, богино хугацаанд үерлэх магадлал өндөр тул голын эрэг дагуу суурьшиж, нутаглаж буй малчид, ард иргэд, аж ахуйн нэгж байгууллага, аялал зугаалгаар яваа хүмүүс үер усны аюулаас болгоомжтой байхыг анхааруулж байна.