Сүхбаатар дүүргийн эрүүгийн хэргийн анхан шатны шүүх 2022 оны зургадугаар сарын 28-ны өдөр шүүх хуралдаанаар хянан хэлэлцэж иргэн Ч. Мөнхбаярыг гадаад улсын тагнуулын албатай хамтран ажиллахаар тохиролцсон, хамтран ажилласан гэмт хэргийг үйлдсэн гэм буруутайд тооцож, түүнд 10 жилийн хугацаагаар хорих ялыг нээлттэй хорих байгууллагад эдлүүлэхээр шийдвэрлэсэн. Өнөөдөр тус шийдвэртэй холбогдуулан түүний өмгөөлөгчид болох А.Батдорж, Г.Баасан нар хэвлэлийн хурал хийлээ.

         Өмгөөлөгч Г.Баасан "Хуулийн хэрэглээ нэг мөр байх зарчим Ч.Мөнхбаярыг шүүсэн хоёр хурал дээр алдсан гэж үзэж байна. Шүүх танхимд ямар ч мэтгэлцээн явуулаагүй. Гэм буруутай гэдэг ганцхан өгүүлбэр хэлээд Ч.Мөнхбаярт 10 жилийн хорих ял оноосныг хүлээн зөвшөөрөхгүй байна.  Ямар үндэслэл дээр тулгуурлаж энэ хэргийг шийдвэрлэсэн, хэчнээн хэмжээний гэм хорыг хэнд учруулсан нь тодорхойгүй.

   Прокуророос шүүх хуралд няцаах дүгнэлт хэлж чадаагүй. Энэ бол байж болшгүй үйлдэл. Шүүгч нар галзуурсан байна. Эх орноосоо урвасан шүүгч, прокурорууд төрийн нэрийн өмнөөс ажиллаж, цалин аваад сууж байж болохгүй.  БНХАУ-ын эрх ашгийг хамгаалж монгол хүнийг яллаж болохгүй. Энэ бол нууц байх боломжгүй. Хуульгүйгээр манай улсын иргэнийг яллаж байна. Хэргийн материалыг ил болгож, Ч.Мөнхбаярт холбогдох шүүх хурлыг дахин явуулах хэрэгтэй. Хуулийн байгууллага давуу эрхээ эдэлж, айлгах гэснээ айлгаж, аварна гэснээ авардаг юм байна. Хуулийн байгууллага нууц гэдэг үгээр далимдуулж гэмт хэрэг хийдэг болжээ. Ийм тохиолдолд бид хуулийн дор амьдарч байна, шүдарга ёсыг тогтооно гэж хэлэх маш аюултай. Бид давж заалдаж байгаа. Давж заалдах шатны шүүхэд шударга ёс алдагдаагүй гэж найдаж байна" гэв.