Өмнөговь аймагт хугацаат цэргийн алба хаагч барилгаас унаж амиа алдсан. Тэгвэл тус хэрэгтэй холбогдуулан Зэвсэгт хүчний жанжин штабаас энэ талаарх мэдээллийг өгч, хариуцлага алдсан албан тушаалтнуудад зохих арга хэмжээг авсан талаар Зэвсэгт хүчний жанжин штабын хэвлэлийн төлөөлөгч Б.Отгонбаяр мэдээлэл хийлээ.

      Тэрбээр "Зэвсэгт хүчний 167 дугаар ангид хугацаат цэргийн алба хаагч албаа хааж байхдаа харамсалтайгаар амь насаа алдсан хэрэг гарсан. Талийгаачийн аав, ээж төрөл төрөгсдөд дахин гүн эмгэнэл илэрхийлье. Өнгөрсөн хугацаанд тус ангид Зэвсэгт хүчний хяналт шалгалт, үнэлгээний газраас шалгалт хийж, хэргийн мөрөөр тодорхой арга хэмжээг авч хэрэгжүүлсэн. Үүнтэй холбогдуулан хууль тогтоомжийн дагуу гарсан тушаалын танилцуулж байна.

•  2022 оны долдугаар сарын 22-ны тушаалаар Зэвсэгт хүчний 167 дугаар  ангийн захирагчийг өнөөдрөөр буюу долоодугаар сарын 25-ны өдрөөс албан тушаалаас нь чөлөөлсөн.
•  Зэвсэгт хүчний хуурай замын цэргийн командлагчийн тушаалын дагуу тус ангийн захирагчийн нэгдүгээр орлогч, штабын даргаар ажиллаж байсан албан тушаалтныг төрийн албанаас халж, сахилгын шийтгэл оногдуулсан.
•  Зэвсэгт хүчний 167 дугаар  ангийн нэгжийн захирагч болон ахлах ахлагч нарыг халж, албан тушаалаас нь чөлөөлсөн.

Талийгаачийн нас барсан шалтгааныг тодруулахаар Өмнөговь аймгийн цагдаагийн газар ажиллаж байгаа ба цагдаагийн дүгнэлт гараагүй учир дэлгэрэнгүй мэдээлэл өгөх боломжгүй байна. Мөн хэргийн талаар худал мэдээлэл цахим орчинд их байна" гэв.