Өнгөрсөн амралтын өдрүүдэд буюу энэ сарын 23, 24-нд Тээврийн цагдаагийн албаны жижүүрийн шуурхай удирдлагын хэлтэс нийт 577 дуудлага хүлээн авснаас зам тээврийн ослын шинжтэй 389 мэдээлэл хүлээн авч шийдвэрлэжээ.

     Бүртгэгдсэн зам тээврийн ослын улмаас нийслэлд хоёр, орон нутагт таван, нийт  хүн гэмтэж бэртсэн бол ноцтой зам тээврийн хоёр ослын улмаас нийслэлд нэг, орон нутагт гурван, нийт дөрвөн хүн  нас баржээ.

     Тодруулбал, Нийслэлд явган зорчигч мөргөсөн хоёр осол бүртгэгдэж хоёр хүн гэмтсэн бол автомашин мөргөлдсөн нэг осол бүртгэгдэж нэг хүн нас баржээ. Харин орон нутагт автомашин онхолдсон таван  осол бүртгэгдэж гурван  хүн гэмтэж хоёр  хүн нас барсан, автомашин мөргөлдсөн хоёр  осол бүртгэгдэж хоёр  хүн гэмтсэн, автомашины тэвшнээс унасан нэг осол гарч нэг хүн нас баржээ.

   Дээрх ослуудын улмаас 8-18 насны гурван хүүхэд гэмтэж, нэг хүүхэд нас барсан байна. Тодруулбал, явган зорчигч нэг, мотоцикл жолоодон бие даан хөдөлгөөнд оролцсон хоёр хүүхэд гэмтсэн бол автомашины тэвшнээс унасан хүүхэд нас барсан байна. Түүнчлэн амралтын өдрүүдэд хүн гэмтсэн 11 осол хэрэг бүртгэгдсэний зургаа  нь мотоцикл жолоодох үедээ хөдөлгөөний аюулгүй байдлыг хангаагүйн улмаас гарчээ.

Үүнээс гадна гудамж замд зохион байгуулсан хяналт, шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон нийслэлд 197, орон нутагт 70, нийт 267 зөрчил илрүүлж, учирч болох эрсдэлээс урьдчилан сэргийлэн ажиллажээ.