Сангийн сайд Б.Жавхлан болон Сангийн яамны удирдлагууд өнөөдөр Хөгжлийн банкинд ажиллаж, зээлийн эргэн төлөлт, явцын талаарх мэдээлэлтэй танилцлаа.

        Хөгжлийн банк 2022 онд нэг их наяд төгрөгийн зээлийг эргэн төлүүлэхээс өнөөдрийн байдлаар 503.5 тэрбум төгрөгийн зээлийг эргэн төлүүлээд байна. Өнөөдрийн уулзалтаар эх үүсвэр нь тодорхойгүй, өмчийн анхны барьцаа өөрчлөгдөж барьцаа хөрөнгийн шаардлага хангахааргүй болсон гурван зээлийн эргэн төлөлтийн асуудлыг Хөгжлийн банкны удирдлагууд Сангийн сайдад танилцууллаа. Тодруулбал “Хөтөл” ХХК-ийн 329 тэрбум төгрөгийн зээл, “Эрэл” ХХК-ийн 129 тэрбумын зээл, “Газ импорт” ХХК-ийн найман тэрбум төгрөгийн зээлийн үлдэгдлийн асуудлыг онцлов.

     Засгийн газрын баталгаатай 2023 оны есдүгээр сард төлөгдөх Хөгжлийн банкны Евро бондын 500 сая доллар, 2023 оны арванхоёрдугаар сард төлөх 720 тэрбум төгрөгийн Самурай бондын өр төлбөрийг Хөгжлийн банкны өөрийн эх үүсвэрээр бүрэн төлж барагдуулахаар ажиллаж байна.

      Цаашид Хөгжлийн банкнаас олгосон бусад зээлүүдийн эргэн төлөлтийг хангуулахад зээл тус бүрт холбогдох арга хэмжээг авч, биелэлтэд хяналт тавьж ажиллах, 2022 онд зээлийн эргэн төлөлтийг нэг  их наяд төгрөгт хүргэж банкны үйл ажиллагааг тогтворжуулж ажиллахыг Сангийн сайд Хөгжлийн банкны удирдлагуудад үүрэг болголоо