Монгол инженерүүд бензин болон цахилгаан хос хөдөлгүүр бүхий туулах чадвар сайтай “Mozo X” автомашин бүтээжээ. Манай орны бартаа ихтэй замд өндөртэй, ямар ч хүнд нөхцөлд унахад тохиромжтойгоос гадна 100 км-т 6,5 л буюу бензин зарцуулалт багатай унааг монголчууддаа зориулан гаргасан байна.

      Mozo X автомашин нь 1.5 мотор, турбо хөдөлгүүртэй, урдаа хөтлөгчтэй бөгөөд нэмэлтээр хойд хоёр дугуй дээрээ цахилгаан мотор суулгаж өгснөөрөө давуу талтай. Хотын хөдөлгөөнд цахилгаан мотороороо 100% цахилгаан машин шиг явах бол бартаат замд бензин хөдөлгүүрээрээ ажиллах онцлогтой байна. 

"Барс Моторс” ХХК-ийн үүсгэн байгуулагч Д.Дэмбэрэлдорж "Энэ бол бүх эд ангидаа баталгаа өгч байгаа цорын ганц машин. Польш, Герман, Беларусийн үйлдвэрийн баталгаатай эд ангиар үйлдвэрлэсэн. Засвар үйлчилгээ нь үнэгүй. Суудал нь эргономик сайтай тул олон цагаар жолоо барихад нуруунд эвтэйхэн гэдгээрээ онцлог. МOZO X машины тестийг Дарханы зам дээр хийсэн учраас монгол орны ямар ч хүнд хэцүү замыг туулахад зохицсон унаа гэж ам бардам хэлнэ" гэв.

  Тус компани өнөөдөр 500 орчим хүнийг ажлын байраар хангаж буй бөгөөд угсарч, үйлдвэрлэсэн автомашинуудаа БНСУ-д экспортлохоор ажиллаж эхэлжээ. Түүнчлэн ирэх арванхоёр сард MOZO EVision хэмээх нэртэй автомашинаа танилцуулах аж.

  “MOZO X” автомашины үзүүлэлт

• Мицубиши мотортой
• Зуун км-т зургаан литр бензин зарцуулдаг
• Туулах чадвар сайтай
• Эд ангийг Европоос нийлүүлдэг
• Бат бөх, эдэлгээний чанар өндөртэй
• Хэрэглэгчдийн тав тухыг хангасан
• Туршилтыг Монголын хүнд нөхцөлтэй замд хийсэн
• Үйлдвэрийн баталгаатай
• Үнэ 129 сая төгрөг бөгөөд лизингээр худалдан авах тохиолдолд Голомт, Богд банкинд хандах боломжтой.
• Захиалга өгснөөс хоёр долоо хоногт багтаан хэрэглэгчийн гарт очно
• Эвдрэл гарсан тохиолдолд 24 цагийн дотор засвар үйлчилгээг хийнэ

      Манай улс жилд ойролцоогоор 500 сая ам.долларын автомашины худалдаа хийдэг бөгөөд үүний багагүй хувийг дотоодын зах зээлд шингээх бүрэн боломжтойг Барс моторсын инженер мэргэжилтнүүд ярьж байлаа.  

Мөн тун удахгүй  Инчёны нисэх онгоцны буудалд “Mozo travel Cafe” нээж олон улсын жуулчдад машинаа суртчилах аж. Инчён нисэх онгоцны буудлаар өнөөгийн байдлаар өдөртөө 50 мянган хүн дамжин өнгөрдөг байна.