Говь-Алтай аймгийн Алтай суманд алба хааж байсан 19 настай байлдагч А.Алтангэрэл бэртэл авч Улаанбаатар хотод ирж, эмчлүүлж байгаа талаар мэдээлэл цахим сүлжээнд цацагдсан. Энэ талаар Хил хамгаалах ерөнхий газрын хурандаа А.Ууганбилэг мэдээлэл өглөө.

  Тэрбээр “Говь-Алтай аймагт байрлах хилийн 214 дүгээр ангид хугацаат цэргийн алба хааж байсан хоёр цэрэг хоорондоо барилдаж байгаад бэртэл авсан тухай цахим сүлжээнд цацагдсан. Тодруулбал, энэ оны зургадугаар сарын 23-ны орой ажлын хувиар дууссаны дараа 23:30 цагийн үед бэртсэн байлдагч А.Алтангэрэл болон хамт алба хааж байсан н.Давгадорж нар хоорондоо барилдаж байх үедээ гэмтсэн гэсэн мэдээлэл ирсэн. Мэдээллийн дагуу Хил хамгаалах байгууллагаас Эрүүл мэндийн яамтай хамтран бэртсэн цэргийн албан хаагчийн биеийн байдалд яаралтай арга хэмжээ авч, хилийн заставаас ангийн төв рүү татсан. Тухайн алба хааж байсан байлдагчийн салбар ангийн төвөөс 160 орчим километр зайтай. Яаралтай эмнэлгийн тусламж үзүүлэх зорилгоор хоёр талаасаа угталцан гарсан. Байлдагчийн ухаан санаа хэвийн байгаа тул яаралтай Говь-Алтай аймгийн төв явах шаардлагатай болсон. Аймгийн төвөөс Улаанбаатар хотын төв рүү хүргэх шаардлагатай болсон. Зургадугаар сарын 25-ны 22 цагийн орчимд ГССҮТ эмнэлэгт ирсэн. Амралтын хоёр өдрийг өнгөрүүлээд зургадугаар сарын 27-ны өдөр томографик шинжилгээ өгсөн. Ингээд зургадугаар сарын 28-ны өдөр нурууны диск урагдсан гэсэн оноштойгоор мэс засалд орсон. Одоо төрийн тусгай албан хаагчийн эмнэлэгт нөхөн сэргээх, хагалгааны дараах эмчилгээ хийлгэж байгаа. Бид байлдагчийн биеийн байдалд анхааран ажиллаж байгаа. Байлдагчийн биеийн байдал сайжирч байна. Хагалгааны дараах шаардагдах бүх арга хэмжээг авч хил хамгаалах байгууллага хариуцан ажиллана.

    Ар гэрээс Говь-Алтай аймгийн цагдаагийн хэлтэст энэ хэргийг шалгах хүсэлт өгсөн. Өнөөдрийн байдлаар  Цагдаагийн хэлтсийн бүрэлдэхүүн ажиллаж байна. Хоёр талын гэр бүлүүдтэй зургадугаар сарын 28-нд уулзсан. Эмч өвчтөнийг хөдөлгөж болохгүй заавал онгоцоор тээвэрлэ гэсэн  заалт өгсөн тохиолдолд хотоос төрийн цэргийн байгууллагатай хамтран ажиллаад онгоц явуулж болох байсан. Тухайн үед эрүүл мэндийн байгуулга автомашинаар тээвэрлэж болно гэж хэлсэн учраас би хүзүүг нь хөдөлгөхгүйгээр бэхэлж тээвэрлэсэн” гэв.