Шар хуайс нь манай орны Хөвсгөл, Хангайн өндөр уулын ам хавцалд зэрлэгээр ургадаг.  Шар хуайс үрээр маш сайн ургадаг олон наст, 2-5 метр өндөр ургадаг модлог сөөгөн, балт ургамал юм. Иш нь ногоондуу туяатай, шаргалдуу холтостой, 4-7 хос навчинцраас бүрдэх нийлмэл навчистай байдаг.

   Үрийг нь долдугаар сарын сүүл наймдугаар сарын эхээр түүнэ. Үр нь шар хуайсны модонд хурууны хэмжээнд арай хүрэхгүй урт гозгор хэлбэрийн уутанд байна. Нэг уутанд 3,4 заримдаа 5,6 ширхэг хүртэл бөөрөнхий үр байна. Үрийг түүж аваад даавуун уутанд хийн нартай газар тавихад уут нь задарч үр нь гарч ирнэ. Тэр үед нь үрийг нь салган авч хадгална.

 Түүж авсан үрийг ихэвчлэн дөрөрдүгээр сарын сүүлийн 10-наас тавдугаар сарын эхний 10 хоногт багтаан тарина. Тарилтын өмнө буцалсан халуун усанд хийж 10-12 цаг дэвтээн хөөлгөнө. Үрийг 1-1.5 см хүртэл гүнд суулгах хэрэгтэй байдаг.

  Хөрс нь хөнгөн сийрэг байвал илүү сайн ургана. Усалгааг тарилтын дараа дөрөв хоногт нэг удаа, хойшид цөөрүүлнэ. Сийрүүлэлт сайн хийж, хог ургамлыг үндсээр нь зулгааж устгах хэрэгтэй.