Зуны улиралд аялал зугаалгаар явахдаа иргэд хийн түлшний зуух, плитка ашиглах нь их байна. Түүнчлэн гялгар материалтай хийтэй бөмбөлгүүдээр хүүхдүүд тоглох дуртай байдаг. Уг бөмбөлөг нь дотроо аюултай хий агуулдаг тул халсан тохиолдолд шууд дэлбэрэх эрсдэлийг дагуулдаг. Энэ талаар МХЕГ-ийн газрын тосны хяналтын ахлах байцаагч Т.Мөнхболдоос тодруулахад:

    Тэрбээр “Манай байгууллагаас жил болгон газ, хийн баллон худалдаалж байгаа газруудад зөвлөмж хүргүүлж, хяналт шалгалтыг хийдэг. Гэсэн ч иргэд маань өөрсдөө зөв хэрэглээгүйн улмаас бэртэж гэмтдэг. Хүндээр бэртсэн, орон байраа шатаасан тохиолдолд л манай байгууллагад мэдээлэл ирдэг. МХЕГ мэдээллийн дагуу очиж торгох, зөвшөөрлийг нь цуцлах арга хэмжээ авдаг учир манайд мэдэгдэхгүй нуух тохиолдол их байна” гэлээ.

Шингэрүүлсэн шатдаг хийн баллон, газын хэрэгсэл, тоног төхөөрөмжийг хэрхэн зөв ашиглах зөвлөмж:

• Хийн баллоныг дулаан үүсгэгч буюу халаах хэрэгслээс 1.5 метр, ил галаас таван метрээс доошгүй зайд байрлуулна,
• Хийн тоног төхөөрөмжийг ажиллуулж байх үед хараа хяналтгүй орхихгүй байх,
• Агааржуулагч ажиллуулах эсвэл өрөөний салхивчийг нээлттэй байлгах,
• Баллон солих үед ил гал гаргахгүй байх, цахилгаан тоног төхөөрөмжийг салгасан байх,
• Хийн тулга /плитка/-н дээр болон түүний ойролцоо амархан шатах эд зүйлс байрлуулж болохгүй,
• Хийн төхөөрөмжийг ажиллуулж дууссаны дараа баллоны хаалтыг заавал хаах;
• Хийн плитканы хаалтыг зориулалтын бус зүйлээр /бахь, чимхлүүр, хөшүүрэг гэх мэт/ эргүүлж болохгүй,
• Хийн хоолойноос уяа уяж юм хатааж болохгүй,
• Бага насны хүүхэд болон хийн тоног төхөөрөмж ашиглах дүрмийг мэддэггүй хүнээр хийн тоног төхөөрөмжийг ажиллуулахгүй байх,
• Хийн төхөөрөмжтэй газар унтаж болохгүй,
• Хийн баллоныг нарны гэрлийн шууд тусгалаас хамгаалах буюу хэт халааж болохгүй,
• Хангагч байгууллагаас олгосон хэрэглэгчийн дэвтэр, зааварчилгааг мөрдөж ажиллах,
• Агуулах, амбаарт дүүрэн шингэрүүлсэн хийтэй баллон хадгалахыг хориглоно,
• Түүнчлэн өрөөнд 50 литрийн багтаамжтай нэг баллон, эсвэл 27 литрийн багтаамжтай хоёр баллон байлгахыг хориглоно.