О.Хангай аваргын малгайн тэмдгийг том, сүрлэг болсон байна хэмээн иргэд шүүмжлэлтэй хандаж байгаа. Энэ талаар түүний малгайн тэмдгийг хийсэн хөөрөг урлаач О.Ариунболдоос тодрууллаа.

    Тэрбээр “Улсын аварга О.Хангай “Р.Пүрэвдавга арслангийн малгайн тэмдэг таалагддаг. Түүнийх шиг хэмжээтэй хийлгэмээр байна” гэсэн. Тэр хоёрын малгайн тэмдгийн тойргийн  хэмжээ ижилхэн. Ардын хувьсгалын 100 жилийн ойн аваргын малгайн тэмдэг гэдэг утгаар нь хангардийг том, биетээр нь хийсэн. Аваргын малгайн тэмдгийг манай хамт олон гурав хоног өдөр, шөнөгүй сууж хийсэн.

    Мөн Р.Пүрэвдавга арслангийн малгайн тэмдгийг манай хамт олон сэргээж байсан юм. Түүний малгайн тэмдэг хөөмөл учраас жижигхэн харагддаг. Баримлаар загвар гаргаж, цутгуурдаж хийхээр материал их ордог. О.Хангай аваргын малгайн тэмдгийг цалин цагаан мөнгөөр хийж, алтны уусмалаар бүрсэн. Аваргын малгайн тэмдгийг хоёр сая орчим төгрөгөөр хийж өгсөн. Түүнд тэмдэг нь таалагдсан" гэв.