Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн үндэсний их баяр наадамд Сэлэнгэ аймгийн Цагааннуур сумын харьяат Б.Орхонбаяр улсын арслан цол хүртсэн. Тэгвэл шинэхэн арслан Б.Орхонбаярт"Алдар спорт хороо", "Атар трейд" ХХК, "Таван хан" дэвжээний бөх Баярсайханы Орхонбаярт, Сэлэнгэ аймгийн удирдлагууд хүндэтгэл үзүүлжээ. Энэ үеэр аймгийн удирдлагууд шинэхэн арслан цолтныхоо мялаалга наадмыг ирэх наймдугаар сарын 5-ны өдөр хийхээр болсон аж.

       Монгол Улсын арслан Б.Орхонбаяр нь бэлтгэл сургуулилтаа анх 2015 оноос эхлүүлж, улсын харцага Т.Өсөх-Ирээдүй багшийнхаа удирдлаган дор базаан, дөрвөн жилийн өмнө сумынхаа наадамд түрүүлж, сумын заан болж байжээ. Тэрбээр 2018 онд сумын заан цолтойдоо аймгийнхаа наадамд анх удаа зодоглохдоо наймын даваанд Н.Энхжаргалыг өвдөг шороодуулан, түрүүлж, аймгийн арслан цол хүртсэн. 2019 онд аймгийн баяр наадамд хоёр дахь удаагаа зодоглохдоо дахин түрүүлж, аймгийн хурц арслан болж өмнөх жилийн амжилтаа батлахдаа үзүүр, түрүүнд Мандал сумын харьяат, Н.Баярбаатарыг өвдөг шороодуулж, хоёр жил дараалан түрүүлсэн гурав дахь бөх болсон түүхтэй.