Монголын үндэсний бөхийн холбооны тэргүүн Ц.Магалжав үндэсний их баяр наадамд дөрөв давсан бөхчүүдээс допингийн шинжилгээ авч буй талаар мэдээллээ.

Тэрбээр "Үндэсний их баяр наадмын тухай хуульд долдугаар сарын 12-нд дөрөв давсан бөхчүүдээс допингийн шинжилгээ авахаар заасан. Энэ хууль журмынхаа дагуу дөрөв давсан бөхчүүдээс шинжилгээ авсан. Биеийн тамир, спортын улсын хороо, Олимпын хороо, Цагдаагийн ерөнхий газар, Тагнуулын ерөнхий газар хамтран ажиллаж бөхчүүдээс допингийн шинжилгээ авлаа. Допингийн эсрэг үндэсний байгууллага шинжилгээгээ Солонгост байдаг Дэлхийн допингийн эсрэг агентлагийн итгэмжлэгдсэн лаборатори руу явуулсан. Хариу нь тодорхой хугацааны дараа ирнэ. Лабораторийн ачааллаас болоод ирэх хугацаа нь өөр байдаг. Азийн орнуудад ковидын тархалт буураагүй байгаа учраас лаборатори нь ачаалалтай байгаа" гэв.