Урин цаг ирж, жимс жимсгэний болц эхэлсэнтэй холбоотойгоор иргэд байгальд гарч зэрлэг жимс, боргоцойг түүх нь ихэссэн. Тэгвэл жимс, самрыг байгальд ээлтэйгээр хэрхэн түүх боломжтой талаарх мэдээллийг хүргэж байна. 

            Болц гүйцээгүй боргоцой нь давирхай ихтэй байдаг тул модны гол ишийг мунаар цохиж самрыг унагааж байгаа нь гол ишийг гэмтээх улмаар физиологийн хаталт өгөх, модлогийн хортон үүрлэх, давирхай их хэмжээгээр гоожих зэрэг олон сөрөг үр дагавруудыг бий болгож байна. Самрыг бэлтгэхэд ургаа модноос, газрын гадаргуугаас унасан боргоцойг түүх гэх мэт аргыг ашиглана. Хушны самрыг бэлтгэхдээ ойн амьтдын идэш тэжээл болон ой байгалийн аясаараа сэргэн ургах нөхцөлийг бүрдүүлэх зорилгоор нэг модны титэм дээрх боргоцойн 50-60 хувийг үлдээнэ. Газрын гадаргаас түүх аргыг том үр жимстэй модны үрийг түүхэд хэрэглэдэг.

       Эхлээд унах хэсэг нь өвчин, хортонд нэрвэгдсэн болон соёолох чадваргүй үр байдаг бөгөөд үүний дараагаар эрүүл үр, боргоцой унадаг. Үр, боргоцойг газраас түүхийн өмнө модны титмийн доорх газрыг тэгшлэх, өвсийг хадаж, цэвэрлэх шаардлагатай. Модон доор дэвссэн брезентэн дэлгэвч дэвссэнээр үрийг гээгдэхээс хамгаалж, хураалтын ажиллагааг хөнгөвчилж, хөдөлмөрийн бүтээмжийг дээшлүүлж, цэвэр үрийн хангамжийг нэмэгдүүлэх боломж нөхцөлийг хангана. жимс жимсгэний нөөцийн 60 хувийг үлдээж 40 хувийг нь түүх зарчмыг баримтална. Түүх явцад жимсний бут сөөгийг гэмтээхгүйгээр , үндсэн хөрс болон үндсэнд гэмтэл учруулахгүйгээр түүх нь чухал.  Хүмүүс нөөцийн 40 хувийг түүснээр, үлдсэн нь байгалийн зэрлэг ан амьтдын хоол тэжээлийн гол үндэс болдог юм. Тиймээс хязгаартай болон, тогтсон заасан хугацаанд жимс түүх нь тохиромжтой. Жимс түүх тохиромжтой хугацаа нь:  

• Нэрсийг наймдугаар сарын 5-наас,
• Үхрийн нүдийг наймдугаар сарын 15-наас
• Мөөг зургаадугаар сарын 15-наас есдүгээр сарын 15 хүртэл
• ​Гүзээлзгэнийг долдугаар сарын 15-наас наймдугаар сарын 15 хүртэл түүхийг зөвшөөрдөг.