10 САРТАЙ ХҮҮХДИЙН ЦЭЭЖИНД НЬ ХОЁР УДАА ХУТГАЛЖ, АМИЙГ НЬ ХӨНӨӨЖЭЭ

     Төв аймгийн нутагт иргэн П нь 10 сартай хүүхдийг "Их уйллаа" хэмээн хутгалж, хөнөөсөн аймшигт хэрэг өнгөрсөн хоёрдугаар сард гарсан билээ. Тухайн үед иргэн П нь эхнэртэйгээ найзынхаасаа мах авахаар Төв аймгийн .... суманд очсон байна. Улмаар хамтдаа согтууруулах ундаа хэрэглэсэн учир, шөнө нь П нь унтаж байхдаа тус айлын 10 сартай У-г “их уйллаа” гэх шалтгаанаар цээжин тус газар нь хоёр удаа хутгалж амь насыг нь хөнөөжээ. Улсын яллагчийн зүгээс түүнд 25 жилийн хаалттай хорих ангид ял эдлүүлэхээр төлөвлөж, шүүхэд саналаа хүргүүлсэн ч шүүхээс 14 жилийн хорих ялыг нээлттэй хорих ангид эдлүүлэх шийдвэр гаргасан байна. Тиймээс амь хохирогчийн ар гэрийнхэн уг шийдвэрийг эсэргүүцэж, давж заалджээ. Хохирогчийн ээж Солонгост сурадг байсан бөгөөд хэрэг болсон өдрөөс 14 хоногийн дараа ирэх байжээ. Хохирогчийн ар гэрийнхэн “Бид үнэхээр гомдолтой байна. Шүүх хурлаас ямар шийдвэр гаргахыг хэлж мэдэхгүй. Намайг шөнө хүн гаргаж өгөхөөр гарсан хойгуур миний зээ охиныг алчихсан байсан. Ээжид нь юу гэж хэлнэ ээ. Ээжээс нь уучлал гуйгаарай гэж уйлаад гуйсан. Гэтэл тэд охиноос минь уучлал ч гуйгаагүй. Тэдний хоёр өмгөөлөгч биднийг доромжилж шахуу харьцдаг. Өнөөдрийг хүртэл тэд бидэнтэй уулзаагүй. Ажил явдал ч оролцоогүй. Яагаад зээ охиныг минь хөнөөснийг одоо хүртэл гайхаж байна. Хүүхдийн дуунаас тэгтлээ залхсан гэж үү. Зургаахан настай эгчийнх нь нүдэн дээр дөнгөж хөлд орох гэж байсан 10 сартай охиныг минь хөнөөсөн. Хүний үрийн халуун цусанд гараа угаачихаад, амьдралыг нь орвонгоор нь устгачихаад уучлал ч гуйгаагүйд гомдолтой байна. Ямар хахир хатуу хүмүүс байдаг юм бэ. Шүүх эмнэлэг тэр этгээдийг архины солиоролтой байсан гэж дүгнэж байна лээ” хэмээн  шүүх хурлын үеэр ярьсан байдаг. 

БИЕИЙН ТАМИРЫН ХИЧЭЭЛД ОРЖ БАЙСАН ДОЛООН НАСТАЙ ХҮҮХЭД САНДАЛД ДАРУУЛЖ, НАС БАРЖЭЭ 

    Мөн Өвөрхангай аймгийн Уянга сумын Хоёрдугаар сургуулийн спорт зааланд биеийн тамирын хичээлдээ орж байсан долоон настай Б хүү эндсэн харамсалтай хэрэг энэ сарын 5-нд гарсан билээ. Хүү биеийн тамирын хичээлд орж байхдаа зааланд байсан волейболын шүүгчийн өндөр сандлыг татаж, дарагдаж эндсэн нь камерын бичлэгт үлджээ. Хэргийг Өвөрхангай аймгийн Цагдаагийн газарт шалгаж байгаа аж. 

     Сүүлийн үед бага насны хүүхдүүд өндрөөс унаж амиа алдаж буй хэрэг ихээр гарч байгаа. Тодруулбал, өнгөрсөн наймдугаар сард бага насны хоёр хүүхэд харгалзах хүнгүй байсан учир өндрөөс унаж амиа алдсан харамсалтай хэрэг гарсан. Иймд эцэг, эхчүүд та бүхэн бага насны хүүхдээ харгалзах хүнгүйгээр үлдээхгүй байх, цонх тагтандаа зориулалтын хамгаалалт, бэхэлгээ хийж болзошгүй эрсдэлээс урьдчилан сэргийлэхийг цагдаагийн байгууллагаас анхаарууллаа.