Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадамд ес давж улсын арслан цол хүртсэн Б.Орхонбаярын талаарх таван баримтыг хүргэж байна.

     Сэлэнгэ аймгийн Цагааннуур сумын харьяат, “Алдар” спортын хороо, “Хос түрүү” ХХК, “Атар трейд” ХХК, “Таван Хан” дэвжээний бөх Баярсайханы Орхонбаяр 1998 оны долдугаар сарын 1-нд төрсөн. 95 кг жинтэй, 180 см өндөртэй ажээ.

      2018 онд сумын заан цолтойдоо Сэлэнгэ аймгийн наадамд анх удаа зодоглохдоо наймын даваанд Н.Энхжаргалыг өвдөг шороодуулан түрүүлж, аймгийн арслан цол хүртэж байсан юм.

    Б.Орхонбаяр 2019 онд Төрийн наадамд анх удаа барилдахдаа 21 настай байсан бөгөөд улсын начин цол хүртэж байжээ. Улмаар тухайн жил начин болсон хамгийн залуу бөхөд олгодог дааганы эзэн болж байлаа.

     Шинэхэн улсын арслан Б.Орхонбаяр сайхан дуулж, уран уншдаг нэгэн. Ээж нь түүнийг ахтай нь хамт багаас нь урлагийн олон тэмцээн уралдаанд оруулж, шүлэг уншуулж, бүжиг бүжиглүүлж, олон талаар нээж, хөгжүүлдэг байсан гэдэг.

  Бэлтгэлээ 2015 оноос хойш улсын харцага Т.Өсөх-Ирээдүйгийн удирдлага дор хийж, 2017 онд Цагааннуур сумын наадамд түрүүлж, сумын заан болсон.