Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ойн баяр наадмын их морины уралдаанд Баянхонгор аймгийн Баацагаан сумын харьяат, аймгийн алдарт уяач С.Энхтөрийн хээр морь хол тасран түрүүлсэн. С.Энхтөрийн хээр морь энэ  жил Төв аймгийн Баянцогт сумын уугуул тод манлай уяач Д.Мөнхбатын галд уяа сойлгоо тааруулсан гэнэ.

Галд нь уяа сойлгоо тааруулсан хээр их насанд түрүүлсэнд тод манлай уяач Д.Мөнхбат “Уяач бүхэн төрийн их баяр наадамдаа унаган нутаг, ус гол, эцгийнхээ нэрийг дуудуулж, айраг түрүү хүртэх юм сан гэх мөрөөдөлтэй байдаг.  Ардын хувьсгалын 100, 101 жилийн ойн баяр наадмаар надад сайхан хувь тохиож их насны морьдын уралдааны түрүү байрыг хүртсэндээ баяртай байна. Энэ жил Говь-сүмбэр аймагт хээр мориныхоо уяа сойлгыг тааруулсан. Уяач бид чинь наадам дөхөх тусам л морио бодоод унтахаа байчихдаг. Тэр дундаа хур бороотой, халуун нартай зэрэг байгаль цаг уурын хүндрэлтэй нөхцөл байдалд хэдэн морьд минь яана даа гэсэн хөндүүр бодолтой байдаг. Олон хүний хөдөлмөрийн үр шимд л морь маань түрүүлсэн дээ” хэмээн сэтгэгдлээ илэрхийлэв.