Дорнод аймгийн Матад сумын нутаг дэвсгэрт байрлах газрын тосны ордоос Хятадын хөрөнгө оруулалттай “Петрочайна” компани 17 жил түүхий нефт зөөсөн байдаг. Үүнийг нутгийн иргэд эсэргүүцэж, Монгол Улсад үр өгөөжтэй болгохыг шаардаж тэмцэж эхэлсэн. Энэ үеэр нутгийн иргэд Халх гол сумын нутаг дэвсгэрт үйл ажиллагаа явуулах зөвшөөрөл авсан газрын тос олборлох компанийн зам, талбайг хаасан гэх мэдээлэл бий. Энэ талаар тус сумын ЗДТГ-ын даргаас тодрууллаа. Тэрбээр “Би Дорнод аймагт ажиллаж байна. Жагсаал, цуглаан хийх журмын тухай хуульд ямар нэгэн байгууллагын зам талбайг хааж, үйл ажиллагаанд оролцсон тохиолдол сумын Засаг дарга захирамж гаргаж, тараах ёстой. Тиймээс Засаг дарга хуулийн дагуу иргэдийг албадан тараах шийдвэр гаргасан. Энэ үеэр цагдаа нар хэн нэгнийг хохироогоогүй.  Албадан тараагаагүйн улмаас хүний амь, тухайн газрынхан хохиролтой гэж үзэх юм бол шийдвэр гаргаагүй албан тушаалтан хариуцлага хүлээдэг юм билээ. Мөн газрын тосны олборлолтыг зогсоох шийдвэрийг ЗГХЭГ-ынхан шийдвэр гаргаж, тогтоодог хуультай. Тэгэхээр аймаг, сумын Засаг даргад олборлолт зогсоох эрх мэдэл байхгүй. Манай сумын иргэд газрын тос олборлох шийдвэр гарснаас хойш найм хоног жагсаал, цуглаан хийж, зам талбай хааж байна” гэлээ.