ХНХЯ-ны сайд А.Ариунзаяа, Сингапурын хамтын ажиллагааны байгууллагын гүйцэтгэх захирал Конг Вай Ман нар “Монгол Улсын онцлогт нийцсэн хуримтлалын нэгдсэн сангийн тогтолцоог бий болгоход дэмжлэг үзүүлэх тухай” санамж бичигт гарын үсэг зурлаа.

  Сингапур улс нь Хуримтлалын нэгдсэн санг амжилттай хэрэгжүүлж Азийн загвар орны нэг болсон. Иймд тус улсын энэхүү туршлага, түүх, алдаа оноо, асуудлыг хэрхэн шийдвэрлэсэн зэргийг судалж, хамтран ажиллах нь бидэнд томоохон дэмжлэг болно.

     Монгол Улсын Ерөнхий сайд Л.Оюун-Эрдэнэ тухайн үед Засгийн газрын Хэрэг эрхлэх газрын дарга байхдаа 2019 онд Сингапур улсад айлчлан Хуримтлалын нэгдсэн сангийн үйл ажиллагаатай танилцаж энэ санг Монгол Улсад бий болгох санаачилга гаргаж байжээ.

      Улмаар Монгол Улсын Засгийн газрын 2020-2024 оны үйл ажиллагааны хөтөлбөр болон Монгол ардын намын сонгуулийн мөрийн хөтөлбөрт “Хуримтлалын нэгдсэн сангаар дамжуулж иргэн бүрийн боловсрол, эрүүл мэнд, тэтгэвэр, орон сууц, нийгмийн хамгааллын үйлчилгээг цогцоор нь шийдвэрлэх тогтолцоонд үе шаттайгаар шилжинэ” гэж зорилт дэвшүүлсэн. 

       Манай улсын хувьд тэтгэврийг улсын төсвөөс олгож байсан хуучин тогтолцоог 1995 оноос өөрчилж нийгмийн даатгалын санд ажил олгогч, даатгуулагчаас төлсөн шимтгэлээс тэтгэвэр олгодог шинэ тогтолцоог одоог хүртэл хэрэгжүүлж байна. Гэвч нийгмийн даатгалын хамрах хүрээг өргөтгөх, тэтгэвэр авагчдын орлогыг нэмэгдүүлэх, даатгалын шинэ төрөл, тогтолцоог нэвтрүүлэх, хуваарилалтын тогтолцооноос хагас хуримтлал, улмаар бүрэн хуримтлалын тогтолцоонд шилжих зорилт одоо хүртэл шийдлээ хүлээж байна.

    Иймд бид Сингапурын хамтын ажиллагааны байгууллагатай удаа дараа цахимаар уулзаж ярилцсаны эцэст зөвлөх үйлчилгээ авах санамж бичиг байгууллаа.