Хөвсгөлд далайд аялалд гардаг Сүхбаатар хөлөг онгоцыг үйлчилгээнд ашиглахыг хориглож, зөвлөмж хүргүүлсэн талаар мэдээлэл цацагдаад байгаа билээ. Тэгвэл энэ талаар Мэргэжлийн хяналтын ерөнхий газрын хэвлэлийн төлөөлөгч Т.Балжиннямаас тодрууллаа.

   Тэрбээр “Болзошгүй эрсдэл, ослоос урьдчилан сэргийлэх, тээврийн аюулгүй байдлыг хангах зорилгоор Мэргэжлийн хяналтын ерөнхий газар, Зам тээврийн хөгжлийн яамны харьяа Далайн захиргаатай хамтран Хөвсгөл аймаг, Архангай аймгийн МХЕГ холбогдох байцаагчид Хөвсгөл, Архангай, Өгий нуурт усан замын тээврийн үйлчилгээ эрхэлдэг аж ахуйн нэгж, байгууллага зөвлөн туслах үйлчилгээ үзүүлсэн. Сүхбаатар хөлөг онгоцны хувьд үйл ажиллагаа засаж, сайжруулах тухай нийт 14 заалттай зөвлөмж өгсөн. 14 заалтаас жишээ татвал “Усан замын тээврийн үйлчилгээ эрхлэх тусгай зөвшөөрөл авсны дараа хөвөлтөд гарах” гэж байгаа. Сүхбаатар хөлөг онгоцны зөвшөөрлийн хугацаа дууссан учраас зөвшөөрлөө авсны дараа хөвөлтөд гарах зөвлөмжийг өгсөн. Мөн энэ завь ачааны зориулалттай байсан ч  суудлын хөлөг онгоц болгочихсон. Тиймээс зорчих иргэдийн аюулгүй байдал, өөрөөр хэлбэл аврах онгоцны тоо хүрэлцээгүй, аврагч усчин тоогоороо ажиллаагүй. Ингээд нийт 14 заалттай зөвлөмжийг хэрэгжүүлээд дараа нь далайд гарч болно гэсэн утгатай зөвлөмж өгсөн. Тэрнээс биш газар дээр нь лац тавьж үйл ажиллагааг нь зогсоогоогүй” гэв.