Монгол Улсын Ерөнхийлөгч У.Хүрсэлсүх өнөөдөр салбартаа тэргүүлсэн эрхмүүдэд шагнал гардуулж байгаа билээ. Энэ үеэр жүжигчин Г.Эрдэнэбилэг Монгол Улсын гавьяат жүжигчин цол хүртлээ.

Тэрбээр “Энэ сайхан нэр хүндтэй шагналыг энгэртээ гялалзуулсандаа баяртай байна. Шагнал авах талаар 2-3 хоногийн өмнө мэдсэн. Шагнал авах талаараа хамгийн эхэнд ойр дотнын хүмүүстээ хэлсэн. Уран бүтээлч хүн гавьяа шагнал гэхээсээ илүүтэйгээр хийж байгаа уран бүтээлдээ дурлаж зүтгэх ёстой юм болов уу гэж боддог. Энэ бол бидний сонгосон мэргэжил, энүүгээрээ ажиллаж амьдарч байгаа. Хамгийн түрүүнд төрүүлж өсгөсөн аав, ээж хоёртоо баярлалаа гэж хэлмээр байна. Ээж минь тэнгэрийн орноос хүүгээ хараад баярлаж байгаа байх. Хүүгээсээ ч илүү баярлах байсан болов уу гэж төсөөлж байна. СУИС-д жүжигчин мэргэжилд чиглүүлж өгсөн С.Сугар багшдаа, найз нөхөд, ханьдаа баярлалаа. Бүх уран бүтээлчдээ баярлалаа.Одоо бид олон ангит кинон дээр ажиллаж байна. Тамгагүй төр” жүжиг олон дээд амжилтыг эвдэж, үзэгчдийн хайр хүндлэлийг хүлээсэнд их баяртай байгаа.  Цаашдаа Монгол Улсаа дэлхийн тавцанд кино, тайзны урлагаар сурталчлан  түгээхийг зорьж, төлөвлөж байна” гэв