УИХ-ын чуулганы нэгдсэн хуралдаан эхэллээ. Нэгдсэн хуралдааны эхэнд УИХ-ын дарга Г.Занданшатар мэдээлэл өглөө. Тэрбээр, УИХ-ын чуулган өнгөрсөн долоо хоногт түр завсарлаж, гишүүд тойрогтоо ажиллаж иргэдтэй уулзалт хийлээ. Иргэдийн ярьж байгаа хамгийн бол зүйл бол үнийн өсөлт. Нефтийн бүтээгдэхүүний үнэ, тээвэр логистикийн хүндрэлээс болж, инфляц өнгөрсөн оны мөн үед 6.2 хувь байсан бол өнөөдөр 16 хувьд хүрлээ. Хүнсний бүтээгдэхүүний үнэ огцом нэмэгдлээ. 

Тухайлбал, /2021 оны мөн үетэй харьцуулснаар/

·         Төмс 900 төгрөгөөс 2500

·         Лууван 2000-аас 4700

·         Ургамлын тос 4300-гаас 9800

·         Байцай 2300-гаас 5000

·         Атар талх 1280-аас 1700

·         Цагаан будаа 3650-иас 4600 төгрөг болжээ.

Үнийн өсөлт ирэх намар хамгийн өндөр түвшинд хүрч болзошгүйг олон улсын банк, санхүүгийн байгууллагуудаас анхааруулж байна.

Инфляци 10 хувиар өсөхөд ядуурлын түвшин 34 хувиар нэмэгдэнэ гэсэн тооцоо судалгааг Үндэсний статистикийн хорооноос гаргасан. Үнийн өсөлтөөс иргэдэд ирэх дарамтыг бууруулах зорилгоор УИХ-аас Ажлын хэсэг байгуулж, иргэдэд ирэх дарамтыг бууруулах арга хэмжээний талаар судлах хэрэгтэй байна. Ард түмний амьдрал өдөр ирэх бүр уруудаж, үнийн өсөлтөд нэрвэгдэж байхад гишүүд найр наадмын хууль батлах тухай ярьж байна гэж иргэд УИХ-ын гишүүдийг маш их шүүмжилж байна. Шатахуун, зарим бүтээгдэхүүний үнийн өсөлтийг бууруулах чиглэлээр авах арга хэмжээний талаар санал боловсруулах УИХ-ын Ажлын хэсгийг Эдийн засгийн байнгын хорооны дарга Ж.Ганбаатар ахлан ажиллана” гэж танилцууллаа.