Бөх болон уяачдын цол, чимэгтэй холбоотойгоор УИХ-ын гишүүн Ж.Мөнхбат мэдээлэл өглөө.

      Тэрбээр "Хэрэв допингтой гэсэн лабортарийн дүгнэлт гараад нотлогдвол автоматаар бөхийн цолоо хураалгана. Ардын хувьсгалын 100, 101 жилийн ойг тохиолдуулан, бөхийн цолны маргаантай асуудлаар Үндэсний бөхийн холбооны саналыг үндэслэн цол олгох эрх бүхий этгээдэд цол олгож болно гэсэн заалт орсон.  Бөхийн цолыг Монгол Улсын Ерөнхийлөгч зарлиг гаргаж олгож байгаа. Иймээс бид заавал цол олгоно гэдэг бол Ерөнхийлөгчийн бүрэн эрхэд халдаж байна гэсэн үг. Тэгэхээр Монголын Үндэсний бөхийн холбоо Ерөнхийлөгчид санал хүсэлтээ тавиад, тэр дагуу Ерөнхийлөгч бөхийн цолыг олгож болно. Нэг барьж байгаа зарчим бол цол олговол, цолны маргаантай бүх хүнд өгье, өгөхгүй бол бүр цол олгохоо болих зүйлийг ярьж байгаа. Мөн  бүсийн наадмаас улсын алдарт уяач авах болзол хуучнаараа, манлай болон тод манлай уяач бол улсын хэмжээний том цол учир босго нь өндөрссөн. Гуравдугаарт, долдугаар сарын 13-ны өдөр уяачдын наадам гэж хийгээд, эрлийз морины гурван насны уралдаан хийж, тэнд улсын цол чимэг өгдөгийг зогсоосон. Мөн зөвхөн зургаан нас уралдана гэсэн байгаа. Үүнийг хаах үүднээс 10, 11-нд бүх сум, аймгийн наадам болохоор болсон” гэв.