Жүдо бөхийн “Улаанбаатар их дуулга-2022” тэмцээний эхний өдрийн барилдаан болж өндөрлөлөө. Өнөөдөр эрэгтэйчүүдийн 60, 66, эмэгтэйчүүдийн 48, 52, 57 кг-ын медальтнууд тодорсон юм. Эх орныхоо дэвжээнд Монголын 20 бөх барилдсанаас медалийн төлөө есөн жүдоч барилдсан аж. Тэднээс Б.Эрхэмбаяр алт, Г.Сод-Эрдэнэ, Г.Наранцэцэг нар мөнгө, Э.Сумьяабазар, Ё.Басхүү, Б.Хорлоодой, М.Ичинхорлоо нар хүрэл медаль хүртсэн билээ.

       Харин өнөөдөр Монголын багийн сүүлчийн медалийн төлөө ОУХМ Л.Энхрийлэн өрсөлдлөө. Гавьяат дасгалжуулагч Ц.Шийрэвийн шавь тэрбээр эмэгтэйчүүдийн 57 кг-ын аваргын төлөө IJF-ийн нэрийн өмнөөс өрсөлдсөн, ОХУ-ын жүдоч Курбонмамадоватыг цэвэр ялж, түрүүллээ. Ингэснээр “Улаанбаатар их дуулга-2022” тэмцээнээс хоёр дахь алтан медалийг Л.Энхрийлэн хүртлээ.