Дотоодын  цэргийн 05 дугаар ангийн цэрэг амиа алдсан хэргийн талаар Дотоодын цэргийн штабаас мэдээлэл хийлээ. Энэ үеэр Цагдаагийн ерөнхий газрын дотоод хяналт аюулгүй байдлын газрын дарга, хурандаа Д.Манлайбаатар мэдээлэл өглөө.

     Тэрбээр “Дотоод хяналт аюулгүй байдлын газраас гурван албан хаагчтай ажлын хэсэг байгуулж албан шалгалт хийж байгаа. Хэрэг авлигатай тэмцэх газар руу шилжсэн. Бид албаны шалгалтын үйл явцад нас барсан байлдагчийн нэгдүгээр ээлжийн цэрэг татлагаар ирснээс хойш хугацаанд цэргийн албан харилцаанд орж байсан асуудал,сургалт дүрэм  журмын дагуу явагдсан эсэх, эмнэл зүйн тусламжийг хэрэгтэй цагтаа авсан эсэх, дарамт шахалт ирж байсан уу гэдгийг шалгах үйл ажиллагаа үргэлжилж байна. Нас барсан албан хаагчтай холбоотой мэдээлэл, дүгнэлт, цэргийн ангид байсан дүрс бичлэгүүдийг нарийвчлан шалгаж байна. Тиймээс одоогоор хэн нэгнийг буруутгаж зөвтгөсөн дүгнэлт мэдээллийг өгөх боломжгүй байна” гэлээ.