Өвөрхангай аймгийн хэмжээнд 2022 оны элсэлтийн ерөнхий шалгалтад 3194 сурагч оролцоно. Тэдгээрээс 365 нь өмнөх оны төгсөгчид, 2829 нь энэ оны төгсөгчид юм.

     Энэ сарын 23-ны өдөр Арвайхээр сумын ерөнхий боловсролын  Нэгдүгээр сургууль дээр түүхийн хичээлээр шалгалт эхэлнэ.Боловсролын үнэлгээний төв, аймгийн БШУГ-аас 60 гаруй мэргэжилтэн элсэлтийн ерөнхий шалгалтын бэлтгэл ажлыг хийж байна.

 БШУГ-ын сургалт, аргазүйн хэлтсийн дарга Э.Батаа: “Олон нийтийн сүлжээнд тавигдсан цаг бол шалгалт эхлэх хугацаа юм. Үүнээс нэг цагийн өмнө ирсэн байх ёстой. Шалгалт 80-100 минут үргэлжлэх учраас сайн унтаж амраад өглөөний цайгаа уугаад ирэхийг зөвлөе. Шалгалтын материалыг шилэн технологиор шууд засах бөгөөд үйл явцыг цахим шууд дамжуулан харуулна. Шалгуулагч танхимаас гарахдаа ЭЕШ-д авсан эхний оноотойгоо танилцах боломжтой юм. Үүний дарааа 24 цагийн дотор хэмжээст оноонд шилжүүлж, Боловсролын Үнэлгээний Төвийн eec.mn сайтад байршуулна” хэмээв.

Шалгуулагч шалгалтад ирэхдээ дараах материалыг бүрдүүлж ирнэ. Үүнд:

• Иргэний үнэмлэх болон түүнтэй дүйцэхүйц баримт бичиг
• Бүртгэлийн хуудас /Энэ оны төгсөгч өөрийн бүртгэлийн дугаар, нууц үгээ ашиглан www.eec.mn цахим хуудасны шалгуулагчийн булангаас бүртгэлийн хуудсаа хэвлэн авч сурч буй сургуулийнхаа захирлаар гарын үсэг зуруулж, тамга даруулан баталгаажуулсан байх, өмнөх оны төгсөгчийн бүртгэлийн хуудас QR кодоор баталгаажсан байх тул шууд хэвлэн авна/
• Суудлын хуваарь /та өөрийн бүртгэлийн дугаар, нууц үгээ ашиглан www.eec.mn цахим хуудасны шалгуулагчийн булангаар нэвтэрч хэвлэж авна/
• Бүрэн дунд боловсролын гэрчилгээ

     Элсэлтийн ерөнхий шалгалт дууссаны дараа их, дээд сургуульд элсүүлэн хуваарилах үйл ажиллагаа явагдах бөгөөд энэ үйл явцыг цахимаар зохион байгуулах хүсэлтийг аймгийн БШУГ-аас Монголын их, дээд сургуулийн консорциумд хүргүүлжээ.