Сэлэнгэ аймгийн Орхонтуул сумын нэгдүгээр багийн Рашаант тосгоны иргэн 14 настай М Орхон голд осолдсон байж болзошгүй тухай дуудлага цагдаагийн байгууллагад иржээ.

                Дуудлагын дагуу тус аймгийн Онцгой байдлын газрын Гал түймэр унтраах, аврах 61 дүгээр ангийн алба хаагчид, Эрэн хайх, аврах анги, Цагдаагийн хэсгийн алба хаагчид, сумын Засаг даргын Тамгын газрын ажилтнууд, орон нутгийн иргэд Орхон гол орчимд эрэн хайх ажиллагаа явуулсан байна. Улмаар Рашаант тосгоны Цуу тайж гэх газраас урагш Орхон голоор 17 км завиар урсаж, гурван метр гүнд зургаан удаа шумбаж, голын эрэг дагуу явган болон автомашинтай эрэн хайсан ч, үр дүнд хүрээгүй тул эрлийн ажиллагааг түр зогсоож, өнөөдрийн 06:00 цагаас дахин эхлүүлээд байгаа юм.