“Хааны эрэлд-2022” энхийг сахиулах ажиллаганы олон улсын хамтарсан сургуулийн үеэр нэгэн онлцог үйл явдал болж байгаа нь “Эмэгтэйчүүд, энх тайван, аюулгүй байдал” сургалт юм.

       Тус сургалтыг АНУ-ын Энэтхэг-Номхон далайн командлалаас зохион байгуулж байгаа бөгөөд БНӨСУ-д явагдаж байгаа UNMISS ажиллагаанд үүрэг гүйцэтгэх эмэгтэй энхийг сахиулагчид болон төрийн болон хууль сахиулах байгууллагуудын эмэгтэй алба хаагчид оролцож байна.Сургалтын нээж, АНУ-ын талаас “Хааны эрэлд-2022”-ийг удирдаж байгаа дэд хурандаа Майкл Тони үг хэллээ. Тэрбээр “Дэлхий дахинд энх тайван тогтоход эмэгтэйчүүдийн оролцоо маш чухал. Тэд энхийг сахиулах ажиллагаанд идэвхтэй оролцдог байсан ч өнөөдрийг хүртэл төдийлөн онцлогдож яригддаггүй байлаа. Харин сүүлийн жилүүдээс НҮБ-ын санаачилгын хүрээнд эмэгтэй энхийг сахиулагчдыг олон нийтэд сурталчлан таниулах, тэдний гавьяа зүтгэлийг алдаршуулах төрөл бүрийн санал санаачилга гарч байгаад туйлаас баяртай байна. АНУ-ын БХЯ ч мөн уг уриалга, зорилгод нэгдэж, идэвхтэй бодлого баримталж байгаа. Та бүхэн энэ удаагийн “Эмэгтэйчүүд, энх тайван, аюулгүй байдал” сургалтаар НҮБ-ын болоод бусад цэргийн ажиллагаанд эмэгтэйчүүдийн үүрэг оролцоо ямар чухал, үнэ цэнэтэй болохыг мэдэх болно. Та бүхэнд амжилт хүсье” гэсэн юм.

          Сургалтыг АНУ-ын Энэтхэг-Номхон далайн командлалын “WPS” хэлтсийн жендерийн зөвлөх хошууч Алексей Фэйнблот ахлан явуулж байгаа бөгөөд жендерийн асуудал эрхэлсэн мэргэжилтнүүд хичээлийг гардан зааж байна. АНУ-ын БХЯ-наас “Эмэгтэйчүүд, энх тайван, аюулгүй байдал”-ын хэлтсийг энэ жилээс бүтцэдээ шинээр байгуулж, анх удаагаа хилийн чанадад сургалт явуулж байгаа нь энэ юм.

          Сургалт үндсэндээ хоёр хэсгээс бүрдэж байгаа бөгөөд эхний өдөр суралцагчдад хичээлийн агуулга, ерөнхий мэдлэгийг олгох юм. Харин хоёр дахь хэсэгт суралцагчдыг баг болгон хувааж, үүссэн цагийн байдалд тохируулан оновчтой шийдвэр гаргах дадлага чадварыг эзэмшүүлэх ажээ.

“Жендер нь дан ганц эмэгтэйчүүдийн асуудлыг хөнддөггүй, үүнд эрэгтэйчүүд, хөвгүүд ч хамаатай. Тиймээс уг сургалтад хамрагдсан хүмүүс жендерийн талаар цогц ойлголт, мэдлэгийг аваад зогсохгүй, олон улсын жендерийн тэнцвэртэй байдлыг хадгалах сүлжээний нэгэн эд эс болно гэдгийг онцлон хэлэхэд таатай байна” гэж ахлах багш хошууч Алексей Фэйнблот хэлсэн юм.

          Анх 1973 БНХАУ-ын Бээжин хотноо 150 улсыг нэгтгэсэн НҮБ-ын хурлын үеэр “Эмэгтэйчүүд, энх тайван, аюулгүй байдал”-ын тунхаг гарч байсан түүхтэй. Үүний дараа 2000 онд НҮБ-ын Аюулгүйн Зөвлөлөөс 1325 тогтоол гарч, энх тайван, аюулгүй байдалд эмэгтэйчүүдийн тэгш, бүрэн оролцоо нь мөргөлдөөнийг зохицуулах , шийдвэрлэхэд тогтвортой энх тайвныг тогтооход чухал үүрэгтэй гэдгийг хүлээн зөвшөөрчээ.