Сэтгүүлч Г.Гэрэлмаагийн хэвлэн нийтлэх эрх чөлөөнд халдсан асуудлаар ЦЕГ-аас хийсэн албаны шалгалтын дүнгийн талаар мэдээлэл хийж байна.

      Энэ үеэр ЦЕГ-ын тэргүүн дэд дарга, хурандаа Ц.Ням-Очир ”Энэ сарын 9-ний өдөр Хан-Уул дүүргийн XI хороо Зайсан дахь төвийн барилгын ажлыг буулгах, Нийслэлийн засаг даргын шийдвэрийн хэрэгжилтийг хангах үйл явцад болсон үйл явдалтай холбогдуулан иргэдээс ирүүлсэн шаардлага, Хууль зүй, дотоод хэргийн сайдаас ирүүлсэн үүрэг ажлын чиглэлийн хүрээнд Цагдаагийн ерөнхий газрын дотоод хяналт, шалгалт аюулгүй байдлын газраас албаны шалгалт явууллаа. Мөн сэтгүүлч Г.Гэрэлмаагаас гаргасан гомдолд мөрдөн байцаах албаны тусгай субъектын үйлдсэн гэмт хэргийг мөрдөн шалгах хэлтсээс мөрдөн шалгах ажиллагаа явж байна.

Албаны шалгалтаар цагдаагийн албан хаагч сэтгүүлч, зураглаачийн биед халдсан, хэвлэн нийтлэх эрх чөлөөнд саад учруулсан, гэм буруутай үйлдэл тогтоогдлоо. Цагдаагийн байгууллагаас нийт сэтгүүлчдийнхээ хэвлэн нийтлэх эрх чөлөөнд саад учруулсан болон сэтгүүлч, зураглаачийн биед халдсан асуудалд уучлалт хүсэж байна.

   Мөн албаны шалгалтаар бид Цагдаагийн ерөнхий газрын дэд болон Нийслэлийн цагдаагийн удирдах газрын дарга, хурандаа Р.Отгонжаргал, мөн Нийтийн хэв журам хамгаалах газрын дарга, хурандаа Б.Оюутболд нарт албан тушаалын сарын цалинг гурван сар 20 хувиар хасах сахилгын шийтгэл оноосон. Хан-Уул дүүрэг дэх цагдаагийн газрын дарга, хурандаа Т.Дамбийням, Нийслэлийн цагдаагийн удирдах газрын нийтийн хэв журам хамгаалах газрын хэв журмын хэлтсийн эргүүл хамгаалалтын тасгийн дарга, дэд хурандаа Б.Даваадорж нарт албан тушаал бууруулах сахилгын шийтгэлийг оногдуулсан. Харин Хан-Уул дүүргийн цагдаагийн нэгдүгээр хэлтсийн хэв журам хамгаалах тасгийн дарга, хошууч Г.Баянбямбад үүрэгт ажлаас нь чөлөөлөх сахилгын арга хэмжээг оногдуулсан. Мөн тусгай субьектээс үлдсэн гэмт хэргийг мөрдөн шалгах хэлтэст шалгагдаж байгаа харьяаллыг Авлигатай тэмцэх газарт шилжүүлэх болно. Цагдаагийн ерөнхий газрын даргын эзгүйд миний бие үүргийг түр орлон гүйцэтгэж байсан. Энэ хугацаанд энэ үйл явдалд болсонд харамсаж байгаагаа илэрхийлж, хариуцлага хүлээхэд бэлэн байгаагаа илэрхийлж байна” гэв.