НЗДТГ, Нийслэлийн Аялал жуулчлалын газар, Улаанбаатар чуулга, “Монголын чопперчин ахан дүүс” НҮТББ-тай хамтран мотоцикл сонирхогчдын дунд “Талын салхи” олон улсын мото фестивалийг зургадугаар сарын 11-нд зохион байгуулна.

    Энэ удаагийн фестивалийг “Эрүүл хүн-Архигүй Монгол” уриан дор зохион байгуулах бөгөөд  Нийт монгол туургатануудын төлөөлөл болсон  100 гаруй мотоцикл сонирхогчид  оролцох юм. “Талын салхи” наадмын зохион байгуулагчид хэвлэлийн хурал хийж мэдээлэл өглөө.

Мотоциклийн үзэсгэлэн, үзүүлэх тоглолт, худалдаа, урлагийн тоглолт болно

Нийслэлийн Аялал жуулчлалын газрын дарга Д.Батсүх :

    -Энэхүү фестиваль  олон улсад нэр хүнд бүхий наадам болон танигдсан. Хөрш ОХУ, БНХАУ болон Англи, Франц, Энэтхэг Улсаас мото спортынхон хүрэлцэн ирж байсан удаатай. Энэ жилийн хувьд цар тахлыг даван туулсны дараах томоохон арга хэмжээ болж байгаагаараа онцлог. Бидэнд ирүүлсэн мэдээллээр ОХУ-аас олон багийн оролцогч манай хотыг чиглэн аян замдаа гарчихаад байна. Өмнө нь Тэрэлж, Цонжинболдогт зохион байгуулдаг байсан бол энэ жилийн фестиваль Сүхбаатарын талбайгаас эхэлнэ. Зургадугаар сарын 11-ний өглөө парад жагсаж, Сүхбаатарын талбайд орж ирнэ. Энэ үеэр ховор нандин мотоциклийн үзэсгэлэн, үзүүлэх тоглолт, дагалдах хэрэгслийн худалдаа, хоол үйлчилгээ, циркийн үзүүлбэр, урлагийн тоглолт болно. Мөн мото клуб,  алдартай тамирчдыг танилцуулна. 

“Монголын чопперчин ахан дүүс” НҮТББ-ын тэргүүн Ш.Сүхбаяр:

-Талын салхи наадам өргөн дэлгэр зохион байгуулах хүлээлттэй байна. Гадаадын улс орны оролцогчдын тоо 100 гаруйд хүрч байна. Оролцогчид эхнээсээ өнөөдрөөс Улаанбаатарт ирж байна. Энэ удаагийн мото фестивальд нийтдээ 35 мотоциклийн клуб, холбоод оролцоно гэлээ.

     “Талын салхи” наадмаа энэ жил нийслэлчүүддээ зориулж хийнэ

Улаанбаатар театрын захирал Р.Мөнхсайхан:

  -“Талын салхи” наадмаа энэ жил нийслэлчүүддээ зориулж хийхээр төлөвлөсөн. Нээлтийн парадын дараагаас 21:00 цаг хүртэл наадам үргэлжилнэ. Нийтдээ 500 гаруй мотоциклчид оролцох төдийгүй тэдгээрээс маш онцгой, шилдэг 20 мотоциклийн үзэсгэлэн гарна. Ховор, нандин хүлгүүд байх болно. Талын салхийн тайзан дээр “Никитон”, “Нисванис”, “Bulsara”, “Lemons” хамтлагууд болон  дуучин Наран, Отгоо нар зорин ирж дуулах бол залуу оддоос Morningstar, Roockie, Don dior, Wolfism, Limit king зэрэг уран бүтээлчид тоглоно.  Мөн үндэсний урлагийн “Хөсөгтөн”, “Онгод” хамтлагаас гадна “Улаанбаатар” театрын уран бүтээлчид энэ өдрийг чимэн, уран бүтээлээ толилуулж, үдэш нь DJ шоу болно” гэлээ.

“Талын салхи” наадам нь мото спорт сонирхдог хүн бүрийн наадам бөгөөд 2019 онд нийтдээ 800 гаруй мото тамирчид оролцож байжээ.  “Цайны зам” олон улсын аялал жуулчлалын холбооны гишүүн болох ОХУ болон БНХАУ-аас 200 мото тамирчид, мөн Япон, Энэтхэг зэрэг улсын төлөөлөл оролцож байсан түүхтэй, сонирхолтой наадам юм. Тус наадмаар дамжуулан тусгай сонирхлын аялал жуулчлалыг хөгжүүлэх,  Монгол Улсыг олон улсад сурталчлах, жуулчдыг татах зорилготой юм. Зургаа дахь удаагаа зохион байгуулах гэж буй мото фестивальд өргөнөөр оролцохыг зохион байгуулагчид хүслээ.