Эргэлт.мн мэдээллийн сайтын сурвалжлах баг Дорнод аймагт үйл ажиллагаа явуулж буй БНХАУ-ын 100 хувийн хөрөнгө оруулалттай “Шинь шинь” ХХК-ийн ашиглаж байсан химийн бодис онц их хэмжээгээр алдагдаж, газрын хөрсөнд нэвчиж, химийн бодистой ус урссаныг хууль, хяналтынхан нуун дарагдуулж байсан ноцтой баримтыг дэлгэсэн билээ.

     Тэгвэл өнөөдөр бидний сурвалжилгын мөрөөр Экологийн цагдаагийн албанаас мэдээлэл хийлээ. Энэ үеэр Ойн ангийн холбогдох албан тушаалтан, зарим нэг сумын удирдлагуудтай холбоотой мэдээллийн талаар Экологийн цагдаагийн албаны нэгдүгээр тасгийн дарга Я.Билэгдэмбэрэл мэдээлэл өглөө.

 Тэрбээр “Хууль бусаар мод бэлтгэх гэмт хэрэгтэй шалгалтын ажиллагаа явуулаад, Ойн ангийн дарга, инженер, зарим сумын засаг дарга нартай холбоотой үйлдлийг илрүүлсэн. Ингэхдээ 13 даргын үйлдлийг илрүүлж, Авлигатай тэмцэх газарт шилжүүлсэн. Тэгэхээр шалгалтын явц, үйл ажиллагааг тус газраас мэдэх учир бид дэлгэрэнгүй мэдээлэл өгөх боломжгүй.

   Харин Экологийн цагдаагийн албанаас дөрөвдүгээр сард өгсөн мэдээллийн дагуу иргэд, энэ төрлийн чиглэлээр үйл ажиллагаа явуулдаг аж ахуйн нэгж байгууллагад урьдчилан сэргийлэх арга хэмжээг зохион байгуулсан. Мөн ойн ангийн дарга, инженерүүд болон БОАЖЯ-тай хамтран хурал зохион байгуулан, мэдээлэл өгсөн.

    Дараа нь мөн БОЖЯ-ны Ойн бодлого зохицуулалтын газартай хамтран судалгаа явуулсан. Ингээд гарал үүслийн бичиг гэх зүйлийг цахим хэлбэрээр олговол илүү үр дүнтэй юм байна гэх дүгнэлт гаргаад, НҮБ-аас хэрэгжүүлж байгаа төслийн хүрээнд цахим гарал үүслийн гэрчилгээг олгодог нэгдсэн аппликэйшн, вэб сайтуудыг хийхээр туршиж байна. Ойн тухай хуульд заасны дагуу хуурайшилтын үед ойд үйл ажиллагаа явуулахыг гуравдугаар сарын 20-ноос зургадугаар сарын 10-ны хооронд хориглосон байдаг. Тэгэхээр одоогоор ойд үйл ажиллагаа явуулах хориотой байгаа. Хорио тавигдахаар шалгалтын үйл ажиллагаа явуулахаар төлөвлөгөө гарган ажиллаж байна” гэв.