Засгийн газраас гаргасан шийдвэрийг Уул уурхай, хүнд үйлдвэрийн сайд Г.Ёндон танилцуулж байна. Тэрбээр “Үндэсний баялгийн сангийн тухай хуулийг Засгийн газрын хуралдаанаар хэлэлцэж, УИХ-д өргөн барьсан. Үндэсний баялгийн сангийн тухай хуульд “Эрдэнэс монгол” компанийн үйл ажиллагааг Үндэсний баялгийн санд бүтэц бүрэлдэхүүнээр нь тодорхой заасан байдаг. Тиймээс “Эрдэнэс монгол” компани Үндэсний баялгийн сан болж байгаа. Тус компанийн охин компаниудын 200 гаруй хүний бүрэлдэхүүнтэй удирдах зөвлөлд бүх салбарын дарга нар байдаг. Үндэсний баялгийн сангийн тухай хуульд орсон “Эрдэнэс монгол” компани дэлхийн томоохон уул, уурхайн корпорацуудын үйл ажиллагааны хэв маягтай төстэй бүлгээр ажилладаг. “Эрдэнэс монгол” компани төрийн эзэмшилтэй уул уурхайн томоохон  бүтэцтэй болж байгаа. Гэхдээ дотор нь байгаа компаниудыг хоёр ангилж байна. Нэг нь зэс металлын групп, нөгөө нь нүүрс, эрчим хүчний групп болж байгаа. Ингэснээр үйл ажиллагааг ТУЗ-өөр удирдаж, “Эрдэнэ монгол” компанитай холбоотой байсан 200 гаруй хүний бүрэлдэхүүнтэй ТУЗ-ийн гишүүд цөөрч, 27 хүний бүрэлдэхүүнтэй болж байгаа юм. Энэ нь компанийн зардлыг хэмнэж, үйл ажиллааг уялдаатай болгож байгаа юм” гэлээ.