Монголын үндэсний морин уралдаан, уяачдын холбооноос төрийн наадамд эрлийз морьд уралдуулахыг эсэргүүцэж, морьдыг үүлдэрлэг байдлаар ялгах хэрэгтэй гэж үзэж, Сүхбаатарын талбай дээр өнөөдөр жагслаа.

    Энэ үеэр Уяач Н.Мөнхбат "Үндэснийхээ өв соёлыг аврах гэж төрийн батлах гэж буй хуулийг эсэргүүцэж байна. Энэ хууль батлагдвал төрийн наадамд монгол морь уралдах боломжгүй болно. Стандарт хэмжээ гэж байхгүй. Гаднын бөх барилдаж байгаагүй шиг наадамдаа монгол морьдоо уралдуулъя. Эрт дээр үеэсээ зургаан насны морьд уралдуулж байлаа. Хэзээ ч есөн насны морьд уралдуулж байгаагүй. Үүлдэрлэг байдлаар нь ялгавал болж байна. Би хараад л мэднэ. Стандарт хэмжээгээ хасчих. Мэргэжлийн хүмүүс нь хараад танина. Монголын соёлыг үгүй хийсэн хууль батлах гэж байна. Монгол наадам монголчуудын дархлаа. Монгол наадамд монгол адуу уралдахгүй байх нөхцөл бүрдээд байна."

       Мөн жагсаалын үед Уяач Н.Санжаадорж "100, 101 жилийн ойгоор хэдэн эрлийз морьдтой хүмүүс түрүүлсэн гэж түүхэнд бичигдэх гэж байна. Энэ бол зөвхөн уяачдын асуудал биш. Монгол түмний асуудал. монгол адуугүй бол монгол хүн, Монгол Улс гэж байхгүй. Түүхээ бодох хэрэгтэй. Бидний өнөөдрийн амьдрал монгол адуутай холбоотой учир бид зогсохгүй тэмцэнэ."

     Харин тод манлай уяач Ц.Дуламсүрэн" Сумын наадамд өмнө нь  80 хязаалан, 80 соёолон уралдаж байсан бол өнгөрсөн жил 25 хязаалан, 23 соёолон уралдсан . Учир нь дандаа эрлийз адуу уралддаг. Жинхэнэ монгол уяач, монгол адуу хоёр наадамдаа оролцох эрхгүй болж байна. Монгол нүүдэлчин иргэншлийг тээж байгаа ганц зүйл бол монгол адуу юм.  Зөвхөн уяачдын эрх ашиг биш ээ. “Чи 60 гарлаа. Одоо боль” гэж манай найзууд хэлж байна. Тэд хэзээ үхэхээ мэдэхгүй мөнгө цуглуулж байна. Харин надад мөнгө биш монгол өв соёл хэрэгтэй байна."