ТАНИЛЦ: “Гэгээн Муза-16” олон улсын театрын наадмын Драмын жүжгийн төрлийн "ШИЛДЭГ ЗОХИОЛЧ" номинацид нэр дэвшигчид

2022-06-03, 1021

Драмын урлагийн шилдэг уран бүтээл, уран бүтээлчдийг шалгаруулах "Гэгээн Муза-16" олон улсын театрын наадам энэ сарын 11-нд зохион байгуулагдаж, шилдгүүд тодорно. “Гэгээн Муза” олон улсын театрын наадмын шалгаруулалтын журамд өөрчлөлт орж, “Үндсэн жүжгийн ангилал” буюу “Драмын жүжгийн төрөл”, “Хөгжимт жүжгийн төрөл”, “Хүүхдийн жүжгийн төрөл”-д Гран При шагнал,“Бэсрэг жүжгийн ангилал” буюу “Нэг хүний жүжгийн төрөл”, “Хоёр хүний жүжгийн төрөл”-үүдэд Гран При шагналыг тус бүр уламжлал болгон олгож байхаар болсон билээ.

Тэгвэл энэ жилийн наадмыг “Хүүхэд оролцооны бүтээл” болон “Драмын жүжгийн төрөл”, “Хөгжимт жүжгийн төрөл”, “Хүүхдийн жүжгийн төрөл”, “Хоёр хүний жүжгийн төрөл”, “Нэг хүний жүжгийн төрөл”-д зохион байгуулах аж. Энэ удаагийн Драмын жүжгийн төрлийн "ШИЛДЭГ ЗОХИОЛЧ" номинацид дараах гурван зохиолч нэр дэвшиж байна.

"АННА Каренина" жүжгийн зохиолч Норовын ПҮРЭВДАГВА

Дэлхийн шилдэг, заавал унших ёстой романуудын нэгд тооцогддог Оросын алдарт зохиолч Лев Толстойн “Анна Каренина” зохиолыг Монголын тайзнаа анх удаа амилуулсан зохиолч гэдгээр нь Н.Пүрэвдагва гуайг уншигчид мэднэ. Тэрбээр өмнө нь “Кихот ноён”, “Амьгүй албат”, “Фауст” зэрэг дэлхийн сонгодгуудыг тайзны бүтээл буюу жүжгийн зохиол болгосноос гадна У.Шекспир, Карло Гольдони, Карло Гоцци, Бернард Шоу, Бертольд Брехтийн бүтээлийг эх хэлнээ хөрвүүлсэн авьяаслаг нэгэн юм.

Төлөв даруухан, чадварлаг түүнийг хийсэн, хийж буй, хийхээр төлөвлөж буй уран бүтээлүүд нь чимдэг гэхэд хилсдэхгүй бизээ.

Хэвлэлд өгсөн нэгэн ярилцлагадаа тэрбээр “Романыг жүжгийн зохиол болгож хөрвүүлэгч хүн эхлээд сонголт хийнэ. Дараа нь тэндээс найруулагч өөрийнхөө юмыг гаргаж авна” гэж хэлсэн байдаг. Энэ үгнээс харвал нийтлэг баригдмал хэв маягаас татгалзаж, шинийг эрэлхийлэх хүсэлдээ хөтлөгддөг, хөглөгддөг уран бүтээлч гэлтэй.

“Гэгээн Муза-16” олон улсын театрын наадмын Драмын жүжгийн төрлийн "ШИЛДЭГ ЗОХИОЛЧ" номинацид "АННА Каренина" жүжгээр оролцож байна. Утга зохиол шүүмжлэгчдийн зүгээс тус зохиолыг дэлхийн бүх цаг үеийн хамгийн шилдэг зохиол нэг хэмээн үнэлсэн байдаг. Тус зохиол дэлхийн олон хэлэнд орчуулагдаж, кино, жүжиг болон урлагийн бусад хэлбэрээр бүтээгдэж нэр алдарт хүрсэн алдартай бүтээл юм. Тус зохиол нь урвалт, сүсэг бишрэл, гэр бүл, гэрлэлт, Оросын эзэнт гүрний аж байдал, хайр дурлал, хот хөдөөгийн амьдралын ялгаа гэх мэт маш өргөн хүрээтэй сэдвүүдийг хөнддөг. Үүнийг жүжгийн зохиол болгон, өнгө төрхийг шинээр бүтээнэ гэдэг зохиолчоос чамгүй авьяас шаардсан нь лавтай.

"ГЭМ ЗЭМ" жүжгийн зохиолч Ядамсүрэнгийн БАЯРАА

Яруу найрагч, утга зохиолч судлаач. Тэрбээр СУИС-ийн Театр урлагийн сургуулийн багш,“Үндэстний тойм” сэтгүүлийн тоймч, “Цөн”, “Таслал” яруу найргийн номуудын зохиогч. Түүний “Таслал” ном 2016 оны утга зохиолын шилдэг бүтээлийн “Алтан өд” шагналыг яруу найргийн төрөлд хүртэж байжээ.

Тэрбээр “Гэгээн Муза-16” олон улсын театрын наадмын Драмын жүжгийн төрлийн "ШИЛДЭГ ЗОХИОЛЧ" номинацид "Гэм зэм" жүжгээр оролцож байна. Ф.М.Достоевский ОХУ төдийгүй дэлхийн утга зохиолд алдар нэрээ үлдээсэн зохиолч билээ. Түүний “Гэм зэм” роман 1866 оны Оросын бурангуй нийгэмд амьдрахын төлөө тэмцэж буй эрийн сэтгэл зүйг өгүүлдэг. Энэхүү бүтээл нь нэрт зохиолчийн Эзэн хааныг алах хуйвалдаанд оролцсоныхоо төлөө шийтгэл хүлээж, Сибирийн цөллөгт явж ирснээсээ хойш бичсэн томоохон бүтээлүүдийн нэг юм.

"ШАР ГЭГЭЭ" жүжгийн зохиолч Шагдарсүрэнгийн ГҮРБАЗАР

Монгол Улсын Соёлын гавьяат зүтгэлтэн зохиолч, яруу найрагч гэдгээр нь түүнийг таних хүн олон. “Гэгээн Муза-16” олон улсын театрын наадмын Драмын жүжгийн төрлийн "ШИЛДЭГ ЗОХИОЛЧ" номинацид “Шар гэгээ” жүжгээр өрсөлдөж байна. Өмнө нь түүний бүтээж байсан томоохон бүтээлүүд гэвэл "Дугуй хээтэй наадам", "Цэргийн ар гэр" жүжиг, "Сэрүүн зүүд" зэрэг олон жүжгийн зохиолыг туурвисан байдаг. Эдгээрээс "Сэрүүн зүүд", "Шөнийн сүүдэр" жүжгийн зохиолоороо Монголын зохиолчдын эвлэлийн шагналыг 2004 онд хүртэж байжээ.

Мөн 2016 онд Их зохиолч Дашдоржийн Нацагдоржийн 110 жилийн ойд зориулан амьдрал уран бүтээлээс сэдэвлэн бичсэн эмгэнэлт жүжиг болох "Жаргаагүй нар" жүжгийн зохиолыг бичиж, тайзнаа амилуулж байсан.

Энэ жилийн “Гэгээн Муза-16” наадамд оролцож буй бүтээл нь Төв аймгийн Монгол туургатан театрын "Шар гэгээ" жүжиг юм. Тус жүжгийн гол агуулга нь Монголчуудын өөрсдийн уг язгуур, соёлын өв, зан заншил, уламжлал, эх хэлний баялгийг жүжгээр дамжуулан ойлгуулах гэсэн үндэсний хэв маягийн шингээсэн гэдгээрээ өвөрмөц.

ТАНИЛЦ: “Гэгээн Муза-16” олон улсын театрын наадмын Драмын жүжгийн төрлийн "ШИЛДЭГ ЗОХИОЛЧ" номинацид нэр дэвшигчид

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.