МУБИС-ийн харъяа Багшийн сургуулийн түүхт 100 жил, хөгжмийн тэнхим байгуулагдсаны 60 жилийн ойн хүрээнд Төрийн шагналт, хөгжмийн зохиолч Цэдэн-ишийн Чинзоригийн “Хүүхдэд зориулсан дуу, аяз” цомогийн нээлт өнөөдөр 17:00 цагт Багшийн сургуулийн “Урлаг” танхимд болно. 

     Төрийн шагналт хөгжмийн зохиолч Ц.Чинзориг агсан “Учран золгохын ерөөл”, “Үүлэн цэнхэр хангай”, “Ус мөрөн олон чиг”, “Зүүдний говь”, “Намрын дурсамж”, “Хорвоод ганцхан ээждээ”, “Дууны хорвоо”, “Сэлүүн дэнжийн яргуй” “Нютаг”  зэрэг сонсогч түмний сонорыг мялаасан 200 гаруй дуу, “Илдэн уулсын цуурай” оратори, “Тэмүжин” дуурь, ятгын концерт, тайз, дэлгэцийн болон найрал дуу, цөөхүүл хөгжимд зориулсан  нийт 400 гаруй бүтээл туурвисан билээ. Тэрбээр зөвхөн мэрэжлийн дуучид, насанд хүрэгсдэд зориулж бүтээлээ туурвиж байсангүй. Нас, насныханд зориулж бичсэн олон бүтээлтэй. Тэрбээр “Тэмүжин” дууриа хүүхдэд зориулан бүтээсэн. Түүний ахлах, дунд ангийн сурагчид, төгсөгчдөд зориулсан “Учран золгохын ерөөл” хэмээх мөнхийн настай дуу урьхан хаврын энэ өдрүүдэд улс даяар цуурайтаж буй.

   “Хүүхдэд зориулсан дуу, аяз” хэмээх цомогт бага анги, цэцэрлэгийн насны хүүхдийн сэтгэхүй, насны онцлогт тохирсон зургаан дуу, төгөлдөр хуур эхлэн суралцаж буй өсвөрийн хөгжимчдөд зориулсан бяцхан аяз, хөгжилтэй дасгал багтсан аж. Цомогт багтсан “Хонхот хүүхэлдэй”, “Туулай хаана унтдаг вэ” хэмээх дуунууд цэцэрлэгийн багачуулын  дуулах  дуртай дуу болж нийтэд түгсэн бол бусад дуу, аяз нь олны сонорт хараахан хүрээгүй бүтээлүүд юм. 

Энэ онд МУБИС-ийн харъяа Багшийн сургуулийн түүхт 100 жил, хөгжмийн тэнхим байгуулагдсаны 60 жилийн ой тохиож байна. Хөгжмийн зохиолч Чинзоригийн халуун залуу нас, ажил амьдралын гараа нь Багшийн сургууль, хөгжмийн тэнхимтэй салшгүй холбоотой. Тэрбээр энэ сургуульд 1971-1975 он хүртэл дөрвөн жил суралцаж, хөгжмийн багшаар 1975-1979 он хүртэл мөн дөрвөн жил ажилласан байдаг.