“Үндэсний номын баяр” 31 дэх удаагаа “Илүү их уншъя” уриа дор гурав хоногийн турш амжилттайгаар үргэлжиллээ.Энэ удаагийн номын баярт 200 гаруй хувь хүн албан байгуулга оролцлоо. Тэгвэл энэ удаагийн номын баярын онцлох таван зүйлийг танилцуулж байна.

Үндэсний номын баярын онцлох ном

Энэ жилийн хувьд иргэд хүүхдийн ном болон жижиг хэмжээтэй ном түлхүү сонгож байв. Харин 31 дэх удаагийн номын баяраар онцлох ном нь  Чарльз Буковскийн “Шүлгүүд” байлаа. Тус номыг орчуулагч, яруу найрагч Г.Лхагвадулам эх хэлнээ хөрвүүлжээ.

“Жинхэнэ хүчтэй эр  хүн,
Жинхэнэ үзэсгэлэнтэй эм хүн гэж хаа ч байхгүй
Энэ бүхнийг нүд анихдаа
Мэдэж байвал хүн
Байж болох ганц ялалтаа
Байгуулж байгаа нь тэр.”

Номын баярын шүхэртэй гудамж

Үндэсний номын баярыг зорьж ирэх нэгэн шалгаан нь Альфа номын дэлгүүрийн шүхэртэй гудамж байлаа. Асруудынхаа голоор өнгө өнгийн  шүхэр өлгөсөн нь халуун нарнаас хамгаалж мөн ид шидийн ертөнц байгаа мэдрэмжийг төрүүлж байв. Номын баяраар зочилж байгаа иргэд дурсгалын гэрэл зураг татуулж түр саатан “Open mic” дээр эгшиглэх дуу, бүжгийн үзүүлбэрийг сонирхох боломжтой байв.

Ногоон талбай, Усан оргилуур

Энэ жилийн номын баярын орхигдуулж болохгүй онцлог нэгэн зүйл нь хөл бөмбөгийн талбайн ногоон зүлэг байлаа. Номын баярт ирсэн иргэд түр саатан тухалж, залуучууд гар бөмбөг тоглож, хүүхдүүд хөгжилдөн гүйцээж байв. Шинэхэн авсан номоо  уншиж эхлэх залуус ч байв. Номун баяр үргэлжилсэн гурван өдөр гадаа халуун байсан учир төв талбайн усан оргилуур дээр усаар тоглох хүүхдүүдийг цангинасан инээд тасарсангүй. Халууцсан залуус усан оргилуур дээр ирэн сэрүүцэж байлаа.

Хонхны баяртай үргэлжилсэн номын баяр

Номын баярын эхний өдрөөс хонхны баяраа хийж байгаа хүүхдүүдээр тасарсангүй. Хонх зүүж дээл өмссөн охид залуус дурсгалын зураг татуулж зарим номын асар дээр хэсэгхэн саатаж нэгэндээ ном бэлэглэж байв. Арван жилээ төгсөж байгаа залуус төгсөлтийн шалгалтад бэлдэхэд хэрэгтэй номуудаа хамтдаа цуглуулж, асууж сурагласаар байв.

Номын баярын бяцхан уншигчид

Энэ жилийн номын баяраар асруудад хүүхдэд зориулсан ном олон байлаа. Бяцхан уншигчид ч энэ жил ихээр ирж оролцож, хүссэн номоо сонгон авч байв.  Эцэг эхчүүд хүүхэд ээ номд дуртай болгохоор зорьж байгаа нь илхэн харагдаж байлаа. Мөн ирсэн хүүхдүүдэд зориулж номын баярт оролцож байгаа асрууд хөгжилтэй тоглоом, асуулт хариултын тэмцээн, жүжигчилсэн тоглолт зэргийг тавьж байлаа.