Сумогийн Нацү башёд өчигдөр Монголоос Ёкозуна Тэрунофужи Г.Ган-Эрдэнэ түрүүлсэн баярт мэдээг бид дуулаад байгаа билээ. Ёкозуна Тэрүнофужи Г.Ган-Эрдэнэ нь Мэргэжлийн сумогийн Исэгахама дэвжээнд харьяалагддаг бөгөөд дээд зиндаа болох макүүчид түрүүлж, оозэки цол хүртэж явсан бөх юм. Тэрбээр гэмтлийн улмаас барилдалгүй өнжиж, жонидан зиндаа хүртэл чансаа нь буурсан бол өнгөрсөн 2019 оноос эхлэн дэвжээндээ гарч ирж барилдаж байгаа билээ.

Ингээд 2020 оны тавдугаар сар гэхэд дээд зиндаанд дахин дэвшиж, долдугаар сарын Нагоя башёд 13-2 түрүүлж, эргэн ирэлтээ зарлажээ. Дараа нь өнгөрсөн жилийн гурав болон тавдугаар сарын башёд түрүүлж, Озеки цол буцаан авсан төдийгүй мөн оны долдугаар сарын башёд 14-1 гэсэн амжилттай үзүүрлэн, мэргэжлийн сумо бөхийн 73 дахь Ёкозүна цолтон болсон юм.

  Түүний сумогийн түүх 17 настайдаа арлын орныг зорих болсноос эхэлдэг бөгөөд дэвжээнд гарахаараа өөртэйгээ их ярьдаг гэдэг юм билээ. Энэ тухай тэрбээр хэвлэлд өгсөн ярилцлагадаа “ Өөрөө өөртэйгээ л ярьж сэтгэлзүйгээ бэлддэг. Хүнээс шалтаг хайхгүй, өөрөөсөө эхэлж хайх. Бүр хэцүү болчихсон үедээ хэнд ч хэлэхгүй, ганцаараа хэсэг сууж өөртөө цаг зарцуулж байж билээ” хэмээн ярьсан байдаг.