Нийслэлийн Ардчилсан намаас "Монголоо Беларусь болгохгүй" цуглааныг энэ сарын 11-нд зохион байгуулсан билээ. Цуглааны үеэр МУГЖ Д.Сосорбарамыг үг хэлж байхад “Дэлхийн Монгол Монгол ногоон нэгдэл” ТББ-ын тэргүүн болон тус байгууллагын залуус гурил цацсан. Тэгвэл өнөөдөр Д.Сосорбарам руу гурил цацсан Х.Бээжин мэдээлэл хийлээ.

Тэрбээр “Э.Бат-Үүл, Д.Сосорбарам Д.Монголхүү тэргүүтэй этгээдүүд Монгол, Оросын 100 жилийн найрамдалт харилцааг хагарган бутаргах санаатай үйлдэл, тархи угаалт олноор хийж байна. Бид үүнийг нь эсэргүүцэж, эсэргүүцлийн хамгийн хөнгөн хэлбэр буюу гурил цацаж эсэргүүцлээ илэрхийлсэн. Гаднын оронд гурил, өндөг зэрэг зүйлээр эсэргүүцлээ илэрхийлэхэд гэмт хэрэгт тооцдоггүй. Гэтэл Э.Бат-Үүл Монгол Улсын Хөдөлмөрийн баатар хүн байж шившлэгтэй, хортой гурил цацлаа гэсэн яриа гаргасан.

                Бид Э.Бат-Үүлийг хүмүүжүүлнэ. Эхний удаад гурилтай очсон бол дараагийн удаад ташууртай очно. Монголчууд эрт дээр үеэс айлын сахилгагүй хүүхдээ мориныхоо чөдрөөр ороолгож, хүмүүжүүлдэг байсан. Тэглээ гээд муудсан юм байхгүй. Бидний үед аавдаа суран тэлээгээр ороолгуулж, бие нь хөнгөрч, нүд нь онгойж, хэл, ам нь зүгширч байсан. Сураар ороолгох дом байдаг. Би Э.Бат-Үүлийг ташуураар ороолгож, домноно” гэлээ.